Brunei Darussalam, 6 Novembru 2023
Prezidente Repúblika, José Ramos-Horta, Segunda ne’e, hasoru malu ho Liurai Brunei Darussalam Sultan Hassanal Bolkiah, iha Palásiu Nurul Iman, Bandar Seri Begawan, iha loron dahuluk husi nia vizita ofisiál ba Brunei Darussalam.
Iha sorumutu ne’e, Prezidente Repúblika agradese ba Sultaun Sultan Hassanal Bolkiah nia apoiu no jenerosidade ne’ebé metin husi Brunei Darussalam. Xefe Estadu hahi’i Sultan nia lideransa ne’ebé matenek no laran-sadi’a ba tinan barak hodi mantein Brunei Darussalam nu’udar ezemplu di’ak ba armonia no prosperidade.
Prezidente Repúblika hato’o nia hakarak atu troka hanoin kona-ba governasaun liuhosi relasaun bilaterál, inklui asuntu rejionál no globál sira no atu esplora dalan sira atu hametin liután relasaun. Xefe Estadu mós rekoñese esforsu Embaixadór Brunei nian ba Timor-Leste, atu habelar no hakle’an liután relasaun bilaterál nasaun rua.
Sultaun Hassanal Bolkiah hatudu nia interese atu bele apoiu Timor-Leste liu-husi area barak hanesan ospitalidade, bolsa estudu no apoiu ba traballadór timoroan.
“Iha enkontru ne’e konsege rezulta asina akordu liu husi MoU ida atu kompania balu iha Brunei bele simu traballadór husi Timor-Leste iha setor oi-oin maibé la’os atu esplora timoroan’’, hateten Prezidente Repúblika ba imprensa.
Partisipa iha enkontru ne’e mak Vise Primeiru Ministru, Ministru Koordenadór Asuntus Ekonómikus no Ministru Turismu no Ambiente, Francisco Kalbuadi Lay, Ministru Negósius Estranjeirus no Kooperasaun, Bendito dos Santos Freitas, Vise-Xefe Estadu-Maior Jenerál Forsas Armadas, Majór-Jenerál Calisto dos Santos “Coliati’’no Embaxadór Timor-Leste ba Brunei Darussalam.
TVET & Mídia PR
