Dili, 15 Novembru 2023
Prezidente José Ramos-Horta ohin husu governu atu foka liu ba dezenvolvimentu infânsia dahuluk ba labarik no kapitál umanu iha lansamentu Inter-Ministeriál Taskforce ba Asuntu Sosiál no Kaptál Umanu iha Timor-Leste.
Iha eventu ne’e Prezidente Ramos-Horta hateten katak investimentu iha edukasaun no nutrisaun iha infânsia dahuluk ba labarik ne’e esensiál tebes ba prosperidade iha futuru nasaun nian. “Hodi fó fundasaun ida-ne’ebé forte ba ita-nia sidadaun sira iha infânsia dahuluk no asegura sira-nia asesu ba ai-han nutritivu”, nia hateten.
Prezidente mós rekoñese dezafiu sira ne’ebé hamosu husi malnutrisaun krónika, hodi haree ho governu nia kompromisu atu kombate kestaun hirak-ne’e. “Iha tinan 2024, Governu sei lansa programa ida-ne’ebé komprensivu atu hasoru rasa badak, inseguransa ai-han no asegura katak labarik ida-idak, inan isin-rua ida-idak, no inan ida-idak iha asesu ba nutrisaun ne’ebé sira presiza atu hetan,” nia afirma.
Prezidente Ramos-Horta hateten mós importánsia husi investimentu iha kapitál umanu, hodi dehan katak ne’e mak xave atu loke poténsia loos nasaun nian.
Lansamentu Taskforce Inter-Ministeriál ne’e nu’udar pasu importante ida ba oin iha esforsu governu nian atu hadi’a povu Timor-Leste nia moris. Taskforce sei servisu hodi koordena no hametin resposta governu nian ba dezafiu dezenvolvimentu kapitál sosiál no umanu.
TVE & Mídia PR
