Reportajen : Madalena Reis
TVe-t, Segunda-feira (08-01-2024) DILI –Prezidente Repúblika Demokratika Timor-Leste José Ramos-Horta, sei partisipa iha Cimeira Vibrant Gujarat ba dala-10 tinan 2024 nian ne’ebé sei hala’o iha nasaun Índia, hahu husi loron 10 to’o 12 fulan Janeiru tinan ne’e.
Sorumutu Globál Vibrant Gujarat, ne’ebé konseptualiza iha tinan 2003 iha lideransa vizionáriu husi Shri Narendra Modi, Primeiru-Ministru Índia, evolve ona iha nivel globál ba rede emprezariál, fahe koñesimentu ho parseria estratéjika sira ba kresimentu inkluzivu no dezenvolvimentu sustentavel.
Primeiru-Ministru Repúblika Índia sei inagura Simeira Globál Vibrante nian ba da-10, iha loron 10 fulan-janeiru. Alende ne’e Prezidente Timor-Leste, Prezidente Emiradus Arabes Unidus no Prezidente Mocambique sei sai nu’udar Xefe Estadu iha Simeira tinan ida ne’e nian.
Liu husi komunikadu imprensa ne’ebe Tve.tl asesu, durante loron rua Prezidente República José Ramos-Horta sei representa estadu Timor-Leste hodi halo abertura iha Simeira refere hodi ko’alia kona-ba oportunidade negósiu sira iha Timor-Leste no promove relasaun bilaterál entre Timor-Leste no Índia.
“Hau hato’o ha’u-nia agradese bo’ot ba konvite atu aprezenta “Oportunidade Investimentu iha Timor-Leste” iha forum internasionál prestijiozu ida-ne’e. Ami kompromete atu kria ambiente emprezariál ida-ne’ebé favoravel, ho lejislasaun tuir prátika internasionál ne’ebé di’ak liu, atu proteje no garante investimentu estranjeiru no parseria kooperasaun ka dezenvolvimentu. Ita-nia diaspora ne’ebé vibrante kontribui maka’as ba dezenvolvimentu nasaun sira ne’ebé sai uma-na’in no Timor-Leste, ho remisaun estranjeiru sai hanesan fonte importante ida ba finansiamentu ba ita-nia ekonomia. Timor-Leste, nasaun ida-ne’ebé pasífiku no di’ak, konvida vizitante sira, emprezáriu sira no investidór sira atu esplora oportunidade foun sira. Ha’u hein katak sorumutu ida-ne’e sei kontinua nafatin hanesan katalizador ida hodi promove parseria ne’ebé fó rezultadu di’ak no kontribui ba dezenvolvimentu sustentavel globál”, Informa Presidente Repúblika José Ramos Horta liu Husi komunikadu imprensa, segunda-feira 08/01.
Alende ne’e Prezidente República José Ramos-Horta mós sei hala’o sorumutu bilaterál ho Primeiru-Ministru Índia.
Atu rekorda fali katak, Repúblika Índia no Timor-Leste ativamente envolve iha setór oin-oin dezde estabelese relasaun diplomátika entre Timor-Leste no Índia iha loron 24 fulan janeiru tinan 2003. Durante sorumutuk iha Simeira ASEAN ba da- 43 iha fulan Setembru 2023 iha Jakarta, Primeiru-Ministru, Shri Narendra Modi anunsia ona desizaun atu estabelese misaun permanente ida iha Timor-Leste, hodi reforsa kompromisu Índia nian ba relasaun diplomátika ho Timor-Leste.
