TVe-t, Tersa-feira (09-01-2024) Díli – Relasiona ho informasaun balu dadaun ne’e sai polemika iha publiku kona ba grupu deskonesido balu halo kobransa ilegal ba kandidatu trabalhador sira ne’ebe naran taka sai ona atu ba servisu iha Austrália iha loron 14 fulan Dezembru tinan 2023, hodi husu osan ba kandidatu trabalhador sira no fo razaun katak sei lá liu husi prosesu teste eskrita no entrevista husi bele ba servisu iha Austrália.
Ho nune’e Diretor Jeral Sefope Carlito Rosário Cabral informa, labele fiar mihis hodi monu ba lasu sira hanesan kobransa illegal, tamba Governo Konstitusional da Sia to’o agora seidauk fo licensa ka autorizasaun ba grupo no ajensia ruma atu halo rekrutamentu ba Timor oan sira hodi ba servisu iha rai liur, tamba prosesu hotu liu husi Sefope ho gratuita hodi facilita Timor oan ba servisu iha rai liur hodi hadi’a ekonomia familia inklui nasaun.
“Ami husu ba kandidatu Sira ne’ebe naran iha lista no ba publiku atu lábele monu ba lasu Sira ne’ebe ema individu ka grupo balun halo kobransa ilegal ba ita bot Sira hodi dehan lá Liu husi procesu ruma bele ba serbisu ona iha rai liur, ne’e lalos. Lá iha grupo ho individu ida maka tama iha procesu ne’e hodi haruka kandidatu sira hodi ba, Tamba procesu hotu-hotu Sefope liu husi Diresaun Nasional Emprego Estrangeiro mak hare klean Kona ba procesu ne’e”, dehan Sefope Liu husi konferesia imprensa iha Kaikoli Díli Segunda-feira 09/01.
Nune’e Sefope rekomenda ba kandidatu trabalhador sira ne’ebe sai ona vítima ba grupo no indivídu sira ne’ebe halo kobransa ilegal bele hato’o keixa ba SEFOPE, PCIC no PNTL atu nune’e hodi halo prosesu ba aktus refere tuir lei konstituisaun RDTL.
