Reportajen:Lidia Amaral
TVE-t, Dili:(10/01/2024) Udan ne’ebé akontese iha kapitál Dili hahù 15:00 too 16:00 lokoraik mosu inundasaun no sasan komunidade hetan estragus.
Udan bo’ot rezulta estrada no valeta balun sai intupidu, tamba nakonu ho foer oin-oin ne’ebé soe arbiru iha mota laran, valeta no estrada públiku.Alende ida ne’e, edifisiu instituisaun públiku sira, loja no kioske ne’ebé lokaliza iha área Caicoli, Audian, Bairru-Pité, Comoro bee nalihun nakonu ho tahu ne’ebe nakonu.
“Haree ba situasaun ida ne’e, Primeiru-Ministru, Kay Rala Xanana Gusmão kontaktu direita Ministru Obras Públika (MOP), Samuel Marçal hodi lidera ekipa tun direita ho ekipamentu pezadu hodi normaliza hikas fatin risku ba dezastre sira iha Balidi Raihun, Caicoli hodi suru sai raihenek no tahu ne’ebé nakonu iha estrada laran inklui hadia hikas mota dalan atu bee labele sobu uma komunidade nian, “Dehan PM Kay Rala Xanana Gusmão liu husi via telefone.
Xefe Governu orienta mós ba liña Ministériu ne’ebé servisu iha área sosiál nian atu salva povu hosi risku dezastre no apoio vitima hirak ne’ebé uma no sasán hetan estragus.
Durante iha terenu, Ministru Obras Públika, Samuel Marçal hamutuk ho ekipa IGE-ADI ne’ebé hetan apoio hisi Kompaña Dili United hala’o mós normalizasaun ba bee dalan iha área Rebal hodi asegura komunidade uma kain -20 labele sofre ba inundasaun no suru sai mós foer no tahu ten ne’ebé intupidu iha valeta eskola sekundariu 04 de setembru Balide
Hafoin suru sai rai no tahu iha estrada laran, ekipa Bombeiros Caicoli Dili ho karreta fase mos kedas tahu ten iha estrada públiku ne’e,ekipa MOP no IGE-ADI koloka mós ekipamentu pezadu hodi halo normalizasaun ba estrada iha área Cristu Rei Dili, Becora, halo indentifikasaun iha área risku ba iha indundasaun.
