Reportajen Madaena Reis
Tve-t, Segunda-feira (15-01-2024), Díli – Sekretária Estadu Protesaun Sívil (SEPS), liuhosi Autoridade Protesaun Sívil (APC-Sigla Português), rejísta komunidade nia uma hamutuk 410 mak hetan estragu hosi inundasaun iha territóriu nasionál.
Xefe Gabinete Relasaun Externa no Komunikasaun (GREC-Sigla Português), Cesário da Silva Marques esplika, hsi loron 09 to’o loron 15 fulan-janeiru 2024, mosu akontesimentu insidente udan bo’ot durante semana ida iha territóriu laran tomak hodi hamosu inundasaun , ho nune’e Autoridade Preotesaun Sivi rejísta uma komunidade hamutuk 432 mak hetan estragu iha munisipiu 11.
“Iha Munisipiu Ainaro, uma-kain ida hetan estragu hosi bee-sa’e, ema na’in-8 kanek, no ema ida lakon nia vida. Iha Ataúro anin sobu uma-ida, Bobonaro anin sobu uma-hitu, Covalima anin sibu uma-ida, bee tama uma haat.Kapitál Dili, ahi-han uma ida, bee tama uma hamutuk 386, Ermera anin sobu uma ida, uma rua bee tama, ema ida lakon vida, tanba mota lori, Likisá anin sobu uma-haat, inundasaun estraga uma-17, Manatuto anin sobu uma ida, Manufahi anin sobu uma-ida. Iha Rejiaun Administrativa Espesial Oecusse Ambeno (RAEOA), ahi han uma-ida, no iha Munisipiu Vikeke anin sobu uma haat, halo vítima sira tenke evakua bá fatin seguru ne’ebé autoridade APC ho autoridade sira munisipiu nian prepara.Durante semana ida ne’e, inundasaun maka dadus ne’ebé aas oitoan, hamutuk 410. Tuir fali maka, anin sobu no halo estragus bá uma, hamutuk 20, ahi han uma rua, ema na’in-ualu mak kanek, no ema na’in-rua mak lakon ona sira nia vida,” Portavós APC, Cesário da Silva Marques, informa bá jornalista sira, liu hosi konferénsia imprénsa iha kna’ar fatin APC, Caicoli-Dili, Segunda (15/01/2024).
Alende ne’e kona-bá apoiu bá vítima sira, presiza hare mós bá iha tipu estragu nian hanesan estragu kamaan, natoon, no estragu totál. Bainhira verifika tiha dadus hotu, hafoin ekipa APC sei fó apoiu ho tipu rua, emerjénsia, no rekoperasaun.
Enkuantu apoiu emerjénsia mak fó apoiu sasán bázika sira mak hanesan, fós, mina, supermie, balde/ember, sabaun, rinso no apoiu rekuperasaun nian maka, distribui kaleen, ai, besi, semente, ho prégu.
“Bá apoiu emerjénsia munisipiu 10, komandu autoridade protesaun sívil ho parseiru sira, fó ona apoiu emerjénsia bá iha vítima sira. Iha Munisipiu Dili, APC seidauk fó apoiu emerjénsia, tanba ekipa sira sei haree hamutuk hela bá dadus finál, hodi fó resposta bá vítima inundasaun sira ne’ebé mak akontese iha Dili, vítima sira hamutuk 386 mak afetadu,” nia informa.
Dadaun ne’e SEPS-APC liuhosi diresaun nasionál Bombeiro iha kada munisipiu, hala’o hela servisu iha terrenu mak hanesan, tesi ai ne’ebé mak monu taka estrada públiku no ameasa komunidade sira nia uma. Enkuantu iha Dili, korpu bombeiru sira lori bee rega no fase mós bá komunidade sira nian uma ne’ebé mak afetadu hosi inundasaun. Alende ne’e, sira mós kontinua hamoos estraga públiku sira.
