Reportajen : Madalena Reis
Tve-t, Dili Kuarta-feira 20 Fevereiru 2024 – Prezidente Repúblika (PR) no Lauriadu Nobel ba Pás, José Ramos-Horta, organiza Resepsaun Diplomátika Anuál iha Palásiu Prezidensiál Nicolau Lobato Bairo Pite Díli.
Iha ninia diskursu abertura, Prezidente Ramos-Horta hato’o benvindu ba diplomata sira no agradese ba sira-nia amizade no apoiu ba Timor-Leste. Nia subliña importánsia husi parseria internasionál sira iha dezenvolvimentu nasaun joven.
“Hanesan onra ida ba ami ba parseria ne’ebé ita harii ona no agradese ba asisténsia ne’ebé ami simu ona durante tinan hirak-ne’e, Eventu sira hanesan Resepsaun ohin-kalan fó oportunidade ida atu hasoru malu fali, hametin relasaun amizade no kooperasaun ne’ebé importante bainhira nasaun ne’e kontinua iha kresimentu,” dehan Prezidente Ramos-Horta.
Resepsaun Anual ne’ebé hala’o kada tinan iha Palásiu Prezidensiál fó oportunidade ida ba komunidade diplomátika atu envolve diretamente ho lider timoroan sira iha situasaun sosiál ida.
Entertantu iha Resepsaun ne’e mós selebra troka kulturál liu husi espozisaun ne’ebé hatudu Timor nia aspetu kultura, liu-liu husi ekspozisaun etnográfika no artístika ne’ebé hatudu tradisaun antigu, kostume, abitus no prátika Timor nian. Ekspozisaun ne’e hakarak kadi interese husi vizitante sira, hodi enkoraja sira atu kontinua esplora rikeza kultura Timor nian.
Prezidente José Ramos Horta hatudu optimizmu ba ligasaun ne’ebé forte liu tán entre Timor-Leste no Komunidade Internasionál iha tinan hirak oin mai.
