Reportajen : Lidia Amaral
Tve-t,Segunda feira 26/02/2024 : Dili – Durante akontese udan kuaze oras ida liu, halo valeta bee dalan hosi Merkadu Taibesi tun too área rotunda estrada Hali-Laran Taibesi Dili intipudu nakonu ho foer teleladas ne’ebé bee lori hosi merkadu laran tun too estrada laran.
Hare ba problema foer toladas ne’ebé nakonu iha estrada laran ho valeta bee dalan, mezmu udan makas, maibé Primeiru-Ministru, Kay Rala Xanana Gusmão tun direta ho kondisaun bokon organiza kedas ekipa Bombeiros no Corpu Seguransa Pesoal (CSP-PNTL) Sanemanetu Munisipiu Dili no komunidade hotu liu-liu labarik lubuk ida ho voluntariu idak-idak halo limpeja jerál iha sira nia uma oin hodi hasai foer oin-oin hanesan masa aqua mamuk, plastiku, modo tahan no foer oin-oin ne’ebé oknum negosiante balun soe fali ba valeta laran.
Impaktu hosi foer ne’ebé soe arbiru halo valeta bee dalan iha áreadores Merkadu Taibesi tun too área Rotunda intupidu halo bee no foer nakonu iha valeta no estrada laran.
Xefe Governu halo kedas avizu ba komunidade hotu-hotu ho kontente, mezmu udan, sai hosi uma hahú hosi ema boot joventu feto mane, ferik no katuas too labarik tama valeta laran no uma ninin hamos, raut no suru sai foer hirak ne’e.
“Hau husu ba imi hotu iha fatin ne’e iha areadores merkadu Taibesi hodi halo limpeza tamba foer nakonu iha imi nia valeta no mos iha uma oin no uma kotuk se ita la hamos foer ne’e sei nakonu iha valeta laran no sei kria susuk moris lori moras dengue tamba susuk moris husi foer no bee nalihun hanesan ne’e mai ita halo limpeza iha idak-idak nia hela fatin,”dehan PM Xanana iha merkadu taibessi(25/2024).
Xefe Governu Xanana alerta mós ba komunidade Dili laran inklui munisipu hotu atu idak-idak halo limpeza iha uma hodi evita susuk no foer ne’ebé bele lori kauza moras oin-oin, tanba rai udan kontinua akontese, tanba problema mudansa klima akontese iha fatin hotu- hotu.
Hafoin avizu ne’e, komunidade ho voluntariu idak-idak organiza aan sai hosi uma halo limpeza iha sira nia uma oin hasai foer iha valate laran ho apoiu hosi ekipa Bombeiros, ekipa Saneamentu Munisipiu Dili, inklui Kompaña Monta Diak ne’ebé oferese karreta loder suru sai tahu no foer tula sai foer hirak ne’e ba soe iha lixu Tibar.
Hafoin limpeja, ekipa Bombeiros hamutuk ho Xefe Governu Xanana kontinua taka hikas valeta hirak ne’ebé sobu no husu atensaun ba negosiante hotu iha Merkadu Taibesi atu labele soer foer arbiru iha estrada no valeta laran.
Entretantu, hafoin limpeza Lider Istóriku hamutuk ho Bomberos lori bee fase no fó haris labarik hirak ne’ebé isin lolon nakonu ho tahu no kompras sapatu foun fahe ba labarik sira ne’ebé hatudu badinas raut foer iha valeta laran inklui fahe bevidas fresku oan doben hirak ne’e hodi agradese ba sira nia apoiu iha servisu voluntáriu ne’ebé nakonu ho espresaun kontente no domin hodi hamos foer iha sira nia uma oin. Durante limpeza ekipa polisia Tack Force no Tranjitu Munisipiu Dili asegura seguransa hodi kontrola movimentu transporte públiku.
