Reportajen : Madalena Reis
Tve-t, Dili, Kuarta-Feira (28-02-2024) – Relasiona ho Timor oan sira ne’ebe ba Servisu iha Austrália no Korea do Sul, dalabarak halai sai husi sistema no sai preokukasaun maka’as iha publiku, maka Governu liu husi Sekretariu Estadu Formasaun Profissional no Emprego (Sefope) prepara ona kondisaun atu evita traballador sira labele halai ses bebeik husi sistema iha futuru.
“Hanesan ita bo’ot sira akompanha mosu ida ne’e sempre ko’alia dehan traballador ilegal maibe sira laos ilegal no sira ne’e hanesan sai deit husi sistema signifika fora husi parte Sefope ho kompania iha rai ne’ebe sira servisu ba, entaun sira sai husi sistema né kauza né maka, Passaporte mate liu ona fulan tolu sira hanoin dehan kompania atu hapara sira entaun sira foti desijaun ses husi sistema”, Dehan Sekretariu Estadu Formasaun Profissional no Emprego Rogério Araújo Mendonça, hafoin asina deklarasaun ho família traballador ne’ebe atu ba servisu iha Korea do Sul, iha salaun Timor Lodge, (28/02).
Governante ne’e argumenta, Governu iha ona meius ida atu bele evita Situasaun ne’e akontese bebeik ba Traballador sira.
“Entaun meius saída mak Governu halo hodi evita no prevensaun ba ita nia traballador sira labele sai husi sistema, primeiru maka parte adidu ho nia asisten tenke servisu maka’as entaun tenke rekolha dadus trabalhadores sira iha área ne’ebe sira servisu atu nune’e balu ne’ebe nia Passaporte atu mate ona tenke Informa na uha adidu nune relata fali ba Sefope no Sefope kontaktu fali ho Ministériu Justisa atu prepara fali ekipa tekniku sira atu hodi ba hasai foto hodi Renova fila fali sira nia passaporte. Portantu ida ne’e hanesan meius ne’ebe Estadu iha atur nune’e prevene atu antisipa Ita Nia trabalhadores sira label sai husi sistema”, Mendonça salienta.
Enkuantu iha Fulan Janeiru liu ba Governu renova ona passaporte mil ital ba trabalhadores sira ne’ebe servisu iha Korea do Sul no Austrália ne’ebe sira nia passaporte mate.
Entertantu tuir dadus, tralhador Timor oan ne’ebe ba servisu iha Austrália no Korea Hamutuk rihun atus ha’at resin, enkuantu sira ne’ebe halai sai husi sistema no hetan dejastre no lakon vida hamutuk 15.
