Reportagen : Madalena Reis
Tve-t, Dili Sesta-feira (01-02-2024) – Polisia Nasional Timor-leste ( PNTL) liu husi Departamentu Investigasaun Kriminal (DIK) alerta ba populasaun iha territóriu laran tomak atu tau atensaun osan falsu $0.50 centavos ne’ebe maka dadaun ne’e sirkula ona iha Timor-Leste
“hakarak hato’o ba publiku Kona ba movimentu osan falsu ne’ebe maka kontinua sirkula iha territóriu laran tomak, atu komunidade bele hatene no hare karik iha ema ruma uza osan falsu ne’e bele kontaktu ba iha enkuadra ne’ebe besik ou bele informa liu husi numeru kontaktu 77230194, Kona ba movimentu osan fali né iha identifikasaun hanesan Tuir Mai, iha osan Falsu $0.50 sentavus nian Nia kor metan ituan diferente ho osan $.050 sentavus original Nia kor mean Ka emas, nune’e iha parte liafuan hakerek Repúblika iha orijinal uza asentuasaun maibe iha ida Falsu lá uza”, informa Xefi Departamentu Investigasaun Kriminal PNTL Superintendente Polisia João Belo Dos Reis, Liu husi konferensia imprensa (01/02).
Nune’e PNTL husu ba Publiku tomak karik hetan ema ruma ne’ebe ba sosa sasan iha kioske uza osan Falsu refere halo favor informa imediata atu nune’e bele loke prosesu buka tuir autor sira ne’ebe maka lori osan falsu halo sirkulasaun.
“Tamba ne’e mak ami husu apoiu komunidade sira atu bele komunika ba PNTL kuandu hetan osan neebe maka ami temi”, Belo Informa.
Enkuantu antes ne’e PNTL hetan ona Keixa balu husi komunidade sira no kontinua halo verifikasaun. Alende ne’e PNTL mos sei servisu hamutuk ho Banco Nasional Timor-Leste (BNCTL) atu sosializa Informasaun ba autoridade munisipiu no komunidade Sira iha território laran tomak.
