Tve-t, Vientiane-Laos, 1 Marsu 2024 – Repúblika Populár Laos, apoiu totál Timor-Leste nia adezaun ba ASEAN iha tinan 2025. Xefe Estadu informa iha vizita Estadu ba Repúblika Populár Laos ne’e atu halo negosiasaun ba Timor Leste nia adezaun ba ASEAN.
Ramos-Horta haktuir, tinan ne’e Repúblika Populár Laos mak lidera Prezidente ASEAN, tanba ne’e Timor-Leste presiza halo promosaun maka’as hodi manan konfiansa husi nasaun membru sira.
“Sira hotu-hotu apoiu ita, relasaun di’ak metin ho Laos, hanesan mós rai sira seluk laiha ida que lahalo amizade ho ita, sira apoia no respeita ita no sira kontenti ho ha’u-nia vizita, Prezidente Laos hakarak mós vizita Timor-Leste, hanesan mós rai sira seluk Filipina, liurai boot Brunei tempu badak sei vizita”, hateten Xefe Estadu.
Horta haktuir Repúblika Demokrátika Popular Laos apoiu totalmente Timor-Leste nia adezaun tuir planu sei ofisializa tama ba ASEAN iha tinan 2025.
Ramos-Horta husu Governu halo avaliasaun ba ‘Road Map’ ne’ebé ASEAN fó ba Timor-Leste hodi hadi’a ekonomia rai laran atu bele iha atrasaun ekonomia. Prezidente Repúblika haktuir iha reuniaun ho Prezidente Laos fó resposta di’ak ba Timor-Leste nia adezaun no hakarak vizita ba Timor-Leste iha tempu besik.
