Reportagem : Sidonio Caet
Tve-t Dili, Segunda-Feira (04/03/2024) – Relasiona ho membru Governu iha loron 26 fulan fevereiru tinan ne’e, ba Abu-Dabhi, Vise Primeiru-Ministru Francisco Kalbuady Lay asina protokolu adezasaun Timor-Leste nu’udar membru Organizasaun Mundiál Komérsiu no Akompaña husi Presidente Repùblika Jose Ramos Horta ho Ekipa Sira no gasta Osan 861.000 Juventude FRETILIN konsidera hamutuk ho membru governu sira la iha moral hodi gasta osan estadu.
“Nu’udar Juventude FRETILIN, jerasaun kontinuadór no nasionalista ba Repúblika Demokrátika Timor-Leste, lamenta ho iresponsabilidade Orgaun Estadu, liuliu Prezidénsia Repúblika, Parlamentu Nasionál no Governu relasiona ho kestaun inefisiensia no disperdisiu finansa públika hodi rame-rame, halo kontenti-an no hariku tan Emiradu Arabe Unidu, iha momentu Timor oan susar” sita husi porta voz Max Mauberek iha Komunikadu Imprensa iha Comite Central Fretilin Comoro Dili.
Enkuantu iha asinatura ne’e, akompaña mós husi Prezidente Repúblika ho nia gabinete, Prezidente Parlamentu Nasional ho Deputadu sira, Vise Primeiru Ministru ho membru Governu sira, inklui dirijente no funsionáriu sira, ho ema hamutuk na’in 121, iha ne’ebé gasta povu nia osan liu dolár amerikanu 861.000.
“Hahalok gasta povu nia osan barak liu, ho ema partisipante barak liu ba de’it asinatura dokumentu ida, nu’udar hahalok ida ne’ebé lakon moral di’ak no ispíritu nasionalista perante povu Timor-Leste. Povu agora dadaun iha situasaun difisil tamba labarik estudante barak presiza profesór, profesór laiha, Pasiente sira presiza médiku no aimoruk, médiku la to’o no aimoruk la sufisiente. Timoroan presiza servisu atu aguenta moris, timoroan sira iha fati-fatin lakon servisu iha ninian rain. Negosiante sira hakarak sustenta moris ho negósiu, maibé lakon atividade negósiu no laiha fatin atu halo negósiu” sita husi porta voz Max Mauberek iha Komunikadu Imprensa iha Comite Central Fretilin Comoro Dili.
Portavoz ne’e esplika Estudante universidade públika atu estuda, livru laiha. Joven sira buka servisu, la hetan servisu, Povu iha área rurál, hein governu nia programa konkretu, governu laiha programa konkretu. Povu nia osan liu dolár amerikanu 861,000 tuir lolos bele uza hodi rezolve problema balun hirak ne’e, la’os ba rame-rame, halo kontenti-an, no aat liu halo riku tan nasaun ne’ebé riku ona, enkuantu povu presiza hela dezenvolvimentu.
Relasiona ho kestaun hirak ne’e, mak Juventude FRETILIN, hanesan jerasaun nasionalista no patriotíka, Repúblika Demokrátika Timor-Leste hakarak ejije pontus hirak tuir mai.
Ejije ba Prezidente Repúblika José Ramos Horta, Prezidente Parlamentu Nasional Fernanda Lay, Primeiru-Ministru Kay Rala Xanana Gusmão ho governante hotu-hotu, atu iha tempu oin mai tenki iha neon no moral di’ak atu deside no uza orsamentu Estadu ho efisiente no efikaz hodi rezolve ho konkretu timoroan sira-nia problema barak iha rai doben Timor-Leste no Ejije ba Governu atu uza orsamentu Estadu, ka baibain, bolu povu nia osan, hodi maksimiza lukru no minimiza desperdísiu finansa públika ba viabilidade finanseira, liuliu investe iha programa pró-povu ne’ebé rentável no sustentável ho prinsipiu justisa, solidariedade, igualdade no inkluzaun ba timoroan sira.
Enkuantu JF mos Ejije ba aparellu Estadu hotuhotu, atu haburas pensamentu no hahalok nasionalista iha dezisaun no aktu sira, katak povu Timor-Leste nia osan tenki investe iha povu Timor- Leste, la’os povu Timor-Leste nia osan, lori la’o ba rai liur hodi hariku tan nasaun neʼebé riku ona, enkuantu timoroan ki’ak ba beibeik.
Nune’e Juventude FRETILIN nu’udar jerasaun nasionalista no patriota, fanu nafatin lider sira atu hader, hateke, haree Timor no halo buat di’ak ba timoroan iha rai doben Timor-Leste, la’os ba toba hela de’it iha rai liur. Sé toba hela de’it iha rai liur, mak filamai iha Timor matan dukur nafatin ba Timoroan sira.
