Tve-t, Vientiane Laos, 01 Marsu 2024 -Prezidente Repúblika José Ramos Horta husu Governu ho Parlamentu Nasionál hadi’a Lei ba rai no Lei investimentu. Pedidu ne’e Xefe Estadu hato’o hafoin hala’o vizita Estadu ba Repúblika Popular Laos.
Ramos-Horta hateten, Governu presiza hadi’a Lei rai no Lei investimentu seguransa no garante ba investimentu sira tuir regras internasionál hodi dada investór ba Timor-Leste.
Nune’e xefe estadu Horta husu ba Parlamentu Nasionál no Governu atu produz Lei tenke ajusta ho tratadu sira iha Organizasaun Mundiál Komersiu no ASEAN nian.
“Governu no Parlamentu tenke haree tratadus nasaun soberanu, ita hakarak hola parte iha ekonomia rejionál mundiál, iha tratadus iha nia regras, be hotu-hotu kumpre. Rai boot hanesan Xina, Amerika mós kumpre, ita-nia adezaun ba ‘WTO’ no ASEAN, oinsá ita haree ita-nia Lei, ita-nia Lei mak tenke adapta ba tratadus sira ne’e, la’os tratadus internasionál ida mak adapta fali ba Lei nasionál ida”, hateten Ramos-Horta.
Prezidente Repúblika José Ramos Horta preokupa ho lei investimentu no Lei rai ne’ebé tenke hadi’a hodi fó resposta di’ak ba investimentu sira ne’ebé hakarak atu investe iha Timor Leste.
Horta haktuir, iha fulan hira liu bá nia konvense investór kuaze atus tolu husi Xina mak ba Timor-Leste atu investe, maibé Governu la fó resporta. Alende ne’e, xefe Estadu husu ba Governu atu halo lei protesaun ba investimentu no Lei dupla tributasaun hodi hamenus selu tasa sira.
