Reportajen : Lidia Amaral
Tve-t, Dili Segunda-Feira (11/03/2024): – Udan bo’ot ne’ebé akontese iha domingu lokraik iha área foho Becora Karau Maten, Balibar no Dare nian rezulta mota boot tun maka’as hodi halo uma komunidade nian lubuk ida iha Taibesi, Becora no Bidau Masaur no Satana Ana kontinu sobre ba unundasaun.
Haree ba problema ida ne’e, Primeiru-Ministru, Kay Rala Xanana Gusmão koordena kedas ho ekipa, Ministériu Obras Publika (MOP), IGE-ADI, Sekretária Estadu Eletrisidade Água no Saneamnetu, Eletrisidade de Timor-Leste, Empresa Públika (EDTL, E.P), BEE Timor-Leste E.P, Sekretaria Estadu Asuntu Toponómia no Organizasaun Urbana no Sekretariu Estadu Reflorasaun no Autoridade Munisipiu Dili tun direita ajuda hadia kanalizasaun bee moos ne’ebé kotu no suru sai rai no foer ne’ebé nakonu iha valete laran.
Kompaña Monta Diak, BTK no Dili United oferese mós karreta, no Excavator ajuda sura sai tahu no foer, enkuandu ekipa Bombeiros kontinua fase kedas estrada ne’ebé tahu no foer nakonu iha área Metiaut nian.
Ekipa sobu mós ponte ki’ik iha área Bidau Santa Ana hodi monta fila fali manila foun hodi fasilta bee mota dalan bele liu ho di’ak hodi evita inundasaun labele akontese fali ba komunidade nia uma.
Diretora Nasionál Manutensaun no Konservasaun Vias Rodovarias, Letigia dos Reis Hanjam Corbafo informa, servisu sira hala’o bazeia ba orientasaun Xefe Governu.
“Hahú dadeer too lokraik ne’e ekipa Ministériu Obras Publika (MOP) nian mai tomak simu orisentasaun hosi Primeiru-Ministru, Kay Rala Xanana Gusmão atu buka solusaun ba problema inundasaun ne’e, tanba valeta bee dalan barak intupidu nakonu ho foer presiza hadia urjensia,” informa Letigia.
Enkuantu iha loron segunda-feira (11/03/24) dadeer ne’e ekipa sira sei kontinua hala’o nafatin servsi too remata.
