Tve-t DILI, 19 Marsu 2024- Primeiru-Ministru, Kay Rala Xanana Gusmão hala’o enkontru ho Embaixadór Tailandia ba Timor-Leste, Atipat Rojamapaibulya hodi deskute kooperasaun bilaterál ne’ebé rai rua estabelese ona.
Embaixador Atipat Rojamapaibulya hateten, Tailândia sei kontinua ajuda kapasitasaun rekursu umanu iha setór saúde no kria mata dalan kona-ba kuidadu saúde inan no oan no apoiu seluk tan.
“Ohin hala’o enkontru ho Primeiru-Ministru, Kay Rala Xanana Gusmão, ami deskute kona-ba kooperasaun bilaterál entre Timor-Leste no Thailandia no primeiru ministru mesiona kona-ba esperensia kona-ba memoria furak forsa Thailandia hola parte iha misaun pas Organizasaun Nasoes Unidas (ONU) iha 20002. Ida ne’e hanesan kooperasaun ida importante ba dezenvolvimentu Timor-Leste no Thailandia apoia nafatin Timor-Leste iha área importante sira no adezaun Timor-Leste atu sai membru ASEAN,” informa Embaixador Atipat Rojamapaibulya ba jornalista iha Palasiu Governu, Dili.
Tailandia mós sei apoia revizaun ba kurikulu hodi dezenvolve rekursu umanu ne’ebé suporta asuntu kuidadu saúde labarik tuir esprensia Tailandia nian bele fahe ba Timor-Leste.
Durante enkontru, Embaixador konvida Xefe Governu Xanana atu hala’o vizita ba Thailandia hodi fahe esperensia kona-ba industria Kafe ba foin sa’e no setór privadu sira hosi Thailandia.
Governu Thailandia, liu husi nia Kooperasaun Teknika, Agensia Kooperasaun Internasionál Thailandia (TICA) sempre apoiu governu no sosiedade Timór iha área oin-oin.
Iha enkontru ne’e, Primeiru Ministru(PM) Kay Rala Xanana Gusmão hato’o agradese ba apoiu hirak ne’e, no Governu kontinua koordena nafatin ho liña ministériu sira hodi kontaktu Embaixada Thailandia bele servisu hamutuk implementa kooperasaun hirak ne’ebé deskute.
Entretantu, Timor-Leste no Thailandia estabelese relasaun diplomatika iha fulan Outubru 2002, hafoin nasaun ne’e restaura independensia no Governu Thailandia haruka ninia forsa partisipa iha misaun Manutensaun Pas Organizasaun Nasoena Unidas (ONU) durante Adraministrasaun Tranzitoria.
