Tve-t Dili, Sesta-Feira ( 22/03/2024) – Lider Maximu Partidu Kmanek Habura Unidade Nasional (KHUNTO) José Dos Santos Naimori Bucar hateten, nu’udar jerasaun foun sei la hamonu IX Guverno Kostituisional ne’ebe mak lidera husi Primeiru Ministeru Kay Rala Xanana Gusmão no Presidente Repúblika José Ramos Horta, tanba sira hetan fiar iha Povu.
Lider Partidu KHUNTO ne’e esplika, nia sei la hamonu Xanana nu’udar. Primeiru Ministru hodi nune’e bele proteze nasaun RDTL.
“Iha ha’u nia espresaun mak ne’e ha’u nu’udar jerasaun foun tenke Estuda buat ne’ebe los la bele sai inimigo iha Politíku, uluk bainhira maun bo’ot Xanana ho maun Taur Matan Ruak iha Diferensia ideologia polítika, ha’u hatete ha’u sei la hamonu maun Taur Matan Ruak iha VIII Governu, no agora iha IX Governu Konstituisionál mós ha’u sei la hamonu maun Xanana Gusmão, tanba ita presiza Estadu ida ne’ebé maduru atu tau- matan ba povu tanba povu maka hili no fó fiar liuhosi eleisaun ida ne’e”. Hateten Naimori Bucar hafoin remata enkontru ho Prezidente Repúblika, José Ramos Horta, iha Palásiu Prezidensiál, Bairo-Pité, Kinta-Feira ne’e (21/03).
Lider patidu KHUNTO ne’e hasoru malu ho Presidente Repùblika José Ramos Horta ne’e hodi husu no rona hanoin husi xefe estadu atu bele Kria Páz no Unidade Nasionál iha rai ne’e.
“Ohin mai hasoru Prezidente Repúblika atu husu hanoin ruma oinsá atu bele kria pás iha rai ida-ne’e, harii unidade nasionál ida entre polítiku na’in sira no presiza rona husi Xefe Estadu atu hotu-hotu bele kompriende saida mak polítika, oinsá atu asegura, Estadu ida presiza lideransa hotu- hotu iha unidade, nune’e Governu ne’ebé ukun bele iha planu ida ne’ebé di’ak ba futuru”, NaiMori hateten.
Tanba ne’e lider Supremu ne’e mos reafirma katak, nu’udar politìka na’in tenke defende páz no dame la’os haree de’it ba politíka nune’e tenke konstrui estadu ida ho di’ak tanba estadu ne’e povu nian.
Aliende ne’e mos Naimori Reprejenta Partidu KHUNTO Konvida Presidente Repùblika José Ramos Horta atu Partisipa no halo abertura ba Kongresu Nasionál Partidu KHUNTO nian, ne’ebe mak sei realiza iha loron 20 no 21 fulan Abril tinan ne’e.
