Tve-t Dili, Tersa-feira (26/03/2024) – Representante povu iha uma fukun Parlamentu Nasional (PN), liu husi bankada opozisaun Kmanek Haburas Unidade Nasional Timor Oan (KHUNTO) hato’o preokupasaun ne’e ligadu ho Virus Rabies (Anjing Gila) ne’ebe maka afeita animal liu husi asu, konfirma sirkula ona iha passabe RAEOA.
Nune’e Bankada opozisaun ne’e husu Governu liu husi Ministeriu da Saude no Ministeriu Agrikultura Pekuaria, Peskas, no Floresta atu serbisu hamutuk oinsa maka bele prevene virus refere hodi labele kontinua daet ba Municipiu seluk iha teritoriu laran tomak.
“Tuir fali kona ba Virus Rabies (Anjing Gila) ne’ebe maka afeita animal liu-liu asu, konfirma sirkula ona iha passabe RAEOA. Tuir informasaun ne’ebe ita hotu asesu katak, virus ida ne’e tata ona ema nain 19 halo kanek no ema nain ida infecta. liu husi teste konfirmasaun katak RABIES POSITIVE”,Antonio Verdial da Silva Ferreira hateten liu husi intervensaun politika iha Parlamentu Nasional (25/03).
Antes ne’e sidadaun Timor Oan ida husi RAEOA ho naran Verônica dos Santos idade 19, nu’udar vítima dahuluk iha Timor- Leste, ne’ebe lakon vida tamba afeta husi vírus Rabies(Raiva), iha loron 23 fuoan marsu tina 2024.
