Tve-t, Dili Sexta feira (12/04/2024) – Governu haruka alterasaun ba lei CAC ho karakter urgensia,no iha loron 12 abril 2024 presidente Parlamento Nasional marka agenda plenaria extraordinaria hodi diskuti no aprova karakter urgencia ba proposta lei 2 alterasaun ba lei n°8/2009, 15 de julho kona ba komisaun anti-korupsaun.
Haktuir lei n°8/2009,15 de julho konaba komisaun Anti-korupsaun,prevene iha n°1 artigo 7° katak parlamentu nasional mak dezigna komissariu ho maioria absoluta, bainhira hetan prezensa husi pelo menus husi deputadu sira iha efetividade funsaun.
Alterasaun ne’ebe governu propoen, liu-liu iha artigu 7 hodi dezigna komissariu ho artigi 11° hodi halo ezonerasaun na komissario ho maioria absoluta de’it 33 deputadus, hasai tiha ezijensia prezensa husi deputadu sira ho efetividade funsaun 49 deputadus.
Situasaun ida ne’e hamosu ditadura maioria la fortifika estadu maibe konsolida de’it poder pessoal. Desizaun ida ne’e efeitos hamosu inserteza no halakon tiha independensia komissariu nian hanesan orgaun ne’ebe bele garante boa governasaun tamba fo liu poder ba primeiru ministru atu kontrola komisaun anti-korupsaun.
Lei ida ne’e mos halo fraku kompetensia Parlamentu Nasional nu’udar orgaun soberanu atu fiskaliza fo liu kbiit ba primeiru Ministro no maioria parlamentar ne’ebe ukun atu kontrola orgaun ida ne’e tuir interesse partidu nian ida ne’e mak ami konsidera partidariza instituisaun estadu nian.
Proposta lei ida ne’e mai kontra feitura lei nian, katak atu altera lei ida no troka ho lei foun,subtansia lei foun tenki di’ak liu lei vigente atu garante melhor funsionamentu orgaun estadu nian.
Nune’e bankada FRETILIN ho PLP konsidera alterasaun ba lei ida ne’e halo fraku KAK no fo monopoliu ba Primeiru Minitru.
Tamba ne’e FRETILIN ho PLP la bele sai kumplise ba desizaun sira ne’ebe mai viola prinsipius legais ne’ebe garante ezistensia estadu direito demokratiku,no halo alterasaun ba lei hodi enfrakese independensia komisaun anti-korrupsaun diak liu maka komissariu KAK ninia knaar hela deit ho prevensaun kriminal no investigasaun kriminal fila fali ba Ministerio publiku hodi garante neutralidade imparsialidade no efetividade iha kombate hasoru korrupsaun.
