Tve-t, Reinu Unidu : 15 Abríl 2024– Primeiru-Ministru (PM), Kay Rala Xanana Gusmão apela ba Timor-oan sira ne’ebé hala’o atividade no manán espriénsia servisu oin-oin iha Reinu Unidu atu servisu ho disiplina no profisonál hodi hetan osan hadi’a ekonomia família, hodi kontribui ba dezenvolvimentu Timor-Leste.
“Ba Timor-oan sira tomak ne’ebé mai buka oportunidade para mai hadi’a sira-nia moris iha Reinu Unidu, hakuak bo’ot no domin tomak ba imi. Imi-nia família tomak hatene imi ba buka esforsu a’an iha ne’e, primeiru tanba ita-nia rain seidauk bele oferese servisu ba ema hotu no segundu aproveita oportunidade ida ne’e imi hadi’a família-nia vida iha Timor,” PM Xanana tatoli mensajen ne’e bainhira hamutuk ho Embaixadór Timor-Leste iha Reinu Unidu, João Paulo halo lansamentu ba programa Podcast “The Citizen’s Connection” iha Otél Sanderson London, sesta (12/04/24).
Xefe Governu husu ba Timor-oan hotu- hotu hatudu a’an hanesan embaixadór foinsa’e atu presta servisu ho disiplina, badinas hodi manán espriénsia servisu no hetan konfiansa hosi povu no Estadu Reinu-Unidu.
“Imi ajuda família iha Timor- laran, imi sira hotu ne’ebé hela iha rai seluk, ita kustume dehan katak, imi ida-idak, sai mós hanesan embaixadór ita-nia rain nian ba iha komunidade ne’ebé imi servisu ba. Ne’e duni favór hatudu imi-nia komportamentu ne’ebé di’ak, imi-nia disiplina ne’ebé a’as, no entrega tomak ba servisu hodi hetan konfiansa hosi sira ne’ebé fó hela servisu ba imi no Governu Reinu Unidus Lori governu nia naran, ha’u tenki agradese ba imi-nia partisipasaun ne’ebé imi hatudu hodi haruka netik buat ruma ba família hodi hadi’a família nia moris, no imi kontinua servisu no hatudu katak, imi Timoro-oan foti a’as ita-nia rain, hosi imi-nia komportamentu,” Eis Prezidente Repúblika ne’e dehan.
Governu liu hosi Emabixada Timor-Leste iha Reinu Unidu kontinua nafatin habelar ninia programa diplomatika nian no tau matan ba Timor-oan sira hotu ninia kondisaun.
PM hatutan, foin lalais selebrasaun loron natal, tinan foun to’o misa pasku sarani rihun ba partisipa misa la’o avontade, tanba problema komesa redús hodi kontribui harii pás no garante estabilidade.
“Ita hotu tenki hamutuk ho esperitu ba dame, esperitu ba hadomi malu, hodi ita nia rain bele dezenvolve a’an,” Líder Karismátiku ne’e apela.
Iha fatin hanesan, Prezidente Asosiasaun Timor iha sidade Peterborough-Reinu Unidu, Celso Oliveira konsidera mensajen Xefe Governu importante hodi motiva Timor-oan sira kontinua servisu disiplina no promove kultura no unidade nasionál entre Timoroan.
“Ho respeita no hadomi tomak hodi rona mensajen hosi ita-nia aman, Maun Boot Primeiru-Ministru, Kay Rala Xanana Gusmão hodi hato’o mensajen ida hanesan aman ba oan sira no husu atu kontinua nu’udar Timor-oan servisu nafatin kontribui ba ekonomia família no ba dezenvolvimentu ba ita Timor-oan sira,” nia orgullu.
Celso Oliveira agradese ba Governu Timor-Leste ne’ebé halo esforsu makas atu kontinua sosa rai hodi harii embaixada Timor-Leste nian iha Reinu Unidu hosi fasilita servisu governu no atende Timor-oan sira.
Bazeia dadus tinan 2017 Timor-oan iha Reinu Unidu hamutuk 16.000, Embaixada seidauk rejista hikas Timor-oan sira, iha parte seluk Timor-oan sira barak mós seidauk ba halo rejista iha Embaixada Timor-Leste iha Londres.
