Tve-t, Segunda Feira (22/04/2024) Portugal – Primeiru-Ministru, Kay Rala Xanana Gusmão akompaña hosi Ministru Juventude, Desportu, Arte no Kultura, Nelyo Isaac Sarmento no Sekretariu Estadu Arte no Kultura (SEAK), Jorge Soares Cristovão hala’o vizita ba paviliaun Portugál ne’ebé promove projetu “Greenhouse” iha Esposizasaun Arte Internasionál iha sidade Biennale de Venice-Italia.
Vizita Xefe Governu Xanana, simu direita hosi Ministra Kultura Portugál, Dalila Rodrigues ho ekipa artista no kuradora sira hodi hala’o vizita ba sira nia espozisaun ne’ebé promove “Greenhouse” ne’ebé prepara hosi artista no kuradora na’in tolu, Mónica de Miranda, Sónia Vaz Borges no Vânia Gala.
Greenhouse hanesan projetu ka arte ida ne’ebé kuratora Mónica de Miranda, Sónia Vaz Borges no Vânia Gala produs arte artistika no koreografer utiliza estatua, video, lian ne’ebé hatudu reflesaun no relasaun entre naturaza, ekologi no politika.
Ministra Kultura Portugál, Dalila Rodrigues hato’o benvidu ba PM Xanana ho membru governu hodi hala’o vizita ba inagurasaun ba paviliaun Portugál nian hodi hatudu sinal kooperasaun rai rua nian hola parte iha espozisaun internasionál ne’e.
“Benvindo Primeiru-Ministru Xanana mai iha paviliaun Portugál nian nu’udar orgullu ida ba ami hodi haree direita projetu Greenhouse ne’ebé promove iha ne’e,” dehan Ministra Dalila.
Governu Portugál sei kontinua promove mós arte konteporánea ne’ebé artista no pintor sira produs promove ba mundu liu hosi espozisaun internasional ne’e.
Iha fatin hanesan, Primeiru-Ministru Xanana hato’o agradese tebes ba Governu Portugál ho ekipa artista hodi promove projetu “Greenhouse” iha esposizasaun Arte Internasionál ba dala-60, ne’ebé hala’o iha sidade Biennale de Venice-Italia. Tanba Timor-Leste foin primeiraves mak partisipa hodi promove obra arte konteporánea no lansa filme “Kiss and Don’t Tell” (Rei, Mais Labele Ko’alia),ne’ebé prepara hosi Artista, Maria Madeira no apoia hosi Kuradora Professora, Natalie King no ekipa.
“Ami agradese no orgullu tebes, primeiraves maka Timor-Leste partisipa iha esposizasaun iha Biennale de Venice-Italia no iha ne’e imi promove Greenhouse no iha Timor nian iha ne’e, senhora Maria Madeira aprezenta filme Kiss and Don’t Tell, kona-ba sofrimentu oin-oin ne’ebé feto sira hasoru iha funu naruk ne’e, no obrigado ba Portugál,”dehan Xanana.
Serimónia ne’e termina ho entrega tais no kafe Timór hosi Xefe Governu ba Ministra Kultura Portugál, Dalila Rodrigues no delegasaun direitor no artista kuradora na’in-tolu.
