Tve-t Dili, 23 Abril 2024 – Prezidente Jose Ramos-Horta fó nia apoiu tomak ba inisiativa ida atu promove valór sira husi Dokumentu Fraternidade Umanu iha sistema edukasaun Timor-Leste nian laran tomak, ho esforsu sosializasaun nian ho alvu ba alunu pre-sekundária, sekundária no universidade iha nasaun laran tomak.
Dokumentu ne’e asina iha tinan 2019 husi Sua Santidade Papa Francisco no husi Imam Boot Al-Azhar Ahmad Al-Tayyeb, husu atu hatama “valor husi pás, justisa, laran-di’ak, furak, fraternidade umanu no koezisténsia nian.”
Iha reuniaun ohin, Xefe Casa Civil Jesuína Maria Ferreira Gomes hateten katak iha tempu badak prezidente sei hahú sosializasaun prinsípiu Fraternidade Umanu iha munisípiu hotu-hotu no disemina Dokumentu ba estudante sira ho nivel estudu oioin. Nia konvida reprezentante sira husi Governu, komunidade relijioza no sosiedade sivíl atu envolve aan ativu iha prosesu ne’e.
Asesór Prezidénsia ba Asuntus Fraternidade Umanu koordena hela esforsu sira iha nivel nasionál kona-ba sosializasaun no diseminasaun, maibé seidauk serteza ba bainhira mak konseitu sira-ne’e tama formalmente iha kurríkulu eskola.
Média PR/Tve-T.
