Tve-t, Baucau 25/04/2024 – Prezidente Republika, José Ramos-Horta liu husi diresaun Sosiedade Sivíl no Apoiu Sosiál (SSAS), Prezidénsial Repúblika, fó apoiu sosiál ba povu suku Alaua-Leten, Postu Administrativu Baguia, Munisípiu Baucau, iha Kuarta-Feira ne’e.
Xefe Suku Alaua-Leten, Joaquim Ximenes, agradese ba apoiu ne’ebé fó husi Prezidente Repúblika José Ramos-Horta.
“Agradese ba Xefe Estadu ho ekipa maske kalan maibé to’o mai hodi fahe nesesidade bázika inklui lori materiál tuir pedidu ne’ebé ami hato’o iha Janeiru 2022, liu-liu husi grupu to’os na’in sira. Ami hanoin katak pedidu ne’e haluha ona tamba tinan rua ona, maibé nafatin konsidera ohin materiál to’o mai”, Expresa Xefe Suku, Joaquim.
Líder komunitáriu ne’e subliña, iha Janeiru 2022 bainhira vizita Alaua-Leten no sira entrega pedidu, la’ós hanesan Prezidente Repúblika, maibé nu’udár Ex-Titulár ( Eis-Prezidente Repúblika 2007-2012).
Tuir Nia, fó pedidu nu’udár ex-titulár iha momentu ne’ebá ho objetivu atu tulun família vulnerálvel inklui atu hasa’e produsaun agrikóla ba komunidade Alaua-Leten.
Iha fatin hanesan, Assesór SSAS, Quintiliano Moníz ne’ebé lori apoiu sosiál ne’e afirma, ” Bainhira atuál Prezidente Repúblika, mai vizita, komunidade balun fó pedidu atu tulun sira, nune’e tuir orientasaun bainhira molok hakat ba Portugál, haruka ha’u atu lori materiál hirak ne’e mai komunidade Alaua-Leten tuir pedidu tambá kleur ona”, Dehan Assesór ne’e.
Entretantu, apoiu sira tuir pedidu mak hanesan “Handtratór” ida, Mákina dulas haree ida, mákina ba “rontok” haree ida, Mákina suku ropa manuál no automátiku ida, ekipamentu desportu unidade ida, Tambór inklui nesesidade báziku ba família vulnerável uma-kain 25 no “manta” hamutuk 120.
