Tve-t,Dili : (03/05/2024) Sexta feira – Primeiru-Ministru (PM), Kay Rala Xanana Gusmão, simu delegasaun investidór ne’ebé xefia hosi Chief Executive Officer, Global Yellow Pages Singapura, Stanley Tan.
Hafoin enkontru, Stanley Tan espresa sentimentu kontente tanba bele hasoru-malu ho Primeiru-Ministru hodi partilla hanoin oinsá fó apoiu bá dezenvolvimentu Timor-Leste (TL).
“Ami mai iha ne’e, hasoru-malu ho Primeiru-Ministru, Kay Rala Xanana Gusmão hodi fahe esperiénsia kona-bá ami-nia atividade sira, no ami hakarak atu apoia Timor-Leste, iha área edukasaun no dezenvolvimentu komunitária. Ida-ne’e mak ami ko’alia ho Primeiru Ministru,” Stanley Tan hateten iha Palásiu Governu, Kinta (02/05).
Xefe Governu apresia no agradese bá inisiativa hosi emprezáriu Singapura ne’e, no ba oin sei haree hamutuk implementasaun programa hirak ne’e.
Stanley Tan, nu’udár CEO Global Yellow Pages Singapore, diretór no fundadór bá empreza investimentu Global Media Holdings, ne’ebé iha mós investimentu estratéjika ida iha Global Yellow Pages Limited.
Stanley Tan hanesan mós diretór bá Angliss Property Group, ne’ebé investe bá imobiliáriu iha Austrália. Tinan barak liu, Sr. Stanley Tan ninia vida negósiu investe mós iha mídia no publikasaun, dezenvolvimentu no investimentu imobiliáriu, otéis no jestaun oteleira.
Stanley Tan, mós hanesan CEO Asia Philanthropy Circle Ltd.(APC) ne’ebé servisu iha área dezenvolvimentu umanu no tempu barak apoia komunidade iha Tiongkok, Timor-Leste, Kamboja, Thailándia no Filipina.
