Tve-t, Dili(03/05/204) v Sexta feira – Primeiru-Ministru (PM), Kay Rala Xanana Gusmão hala’o vizita hodi haree direta Projetu Redezenvolvimentu Muzeu Antigu Komarka-Balide.
Durante minutu 30 nia laran, Primeiru-Ministru hetan esplikasaun detallada kona-bá progressu projetu ne’e hosi Jestór Projetu MAC-B, Januário Soares iha salaun enkontru Centro Nacional Chega! (CNC) I.P ne’ebé partisipa mós hosi Diretór ezekutivu, Hugo Maria Fernandes, Xefe depertementu sira no funsionáriu sira.
Januário Soares esplika, iha loron 31 Agostu 2022, Centro Nacional Chega! (CNC) I.P., reprezenta hosi ninia Diretór Ezekutivu, Hugo Maria Fernandes no Embaixada Repúblika Federativa Alemaña iha Jakarta, Indonézia, reprezenta hosi ninia embaixadora, Sra. Ina Lepel, selebra akordu kona-bá redezenvolvimentu Muzeu Antigu Komarka Balide (MACB), atuál eskritóriu CNC I.P. atu suporta konsolidasaun bá sustentabilidade páz hodi fó espasu halakon sikatriz, fasilita diseminasaun koñesimentu no promosaun ba ko’alia lia-loos, direitus umanus, edukasaun, igualdade jéneru, símbolu reparasaun, rekoñesimentu públiku, no vítimas hosi konflitu.
Atu bele hahú ezekuta projetu ida-ne’e, iha tinan 2023, CNC I.P. hala’o ona konsultasaun ho parseiru sira nu’udár etapa inisiál bá implementasaun projetu.
Hafoin ida-ne’e, CNC I.P., liu-hosi servisu hamutuk ho Sejarah Lintas Batas (SINTAS), kontrata ona kuradór no dezeñadór expozisaun internasionál hodi hahú dezenvolve konseitu no dezeña espasu expozitivu.
Nune’e, iha fulan Novembru 2023, kuradór no dezeñadór finaliza ona dezeñu tékniku kona-bá expozisaun permanente bá Muzeu Antigu Komarca – Balide sai nu’udár sentru ida bá konsiénsia istórika, direitus umanus no páz iha Timor-Leste.
Iha tinan ida-ne’e, CNC I.P kontinua servisu ho espesialista sira iha área oioin hanesan dezeñadór gráfiku, dezenvolvedór konteúdu, konsultór IT, edukatór, sineasta, no seluk tán hodi kompleta konteúdu sira expozisaun ne’ebé sei expoin ho forma fízika no dijitál.
Tuir Januário Soares katak, oras-ne’e daudaun, impelementasaun projetu hahú tama ona bá etapa manutensaun bá fatin expozisaun sira hahú hosi área 01: Resepsaun, área 02: Sala Introdutória, área 03: Sala Rejisténsia, área 04: Sela Nakukun, área 5: Sala Prizoneira, área 06: Sala Audio-Vizuál, área 07: Sala Feto no Labarik, área 08: Sala Toleránsia, área 09; Sala Guarda Prizionál no ikus liu Jardim bá Refklesaun.
“Atu mellora experiénsia vizitante sira nian, sai atrativu, edukativu, asesivel no memorável, expozisaun sira muzeu nian sei kompleta ho teknolojia sira hanesan LED TV, E-Kiosk, Touchscreen, Audio Guide, Mobile App, QR Code, projetór no fasilidade aprendizajen dijitál sira,” Januário Soares esplika.
