Tve-t Metinaro, 05 maiu 20224 – Domingu foin lalais Prezidente Jose Ramos-Horta akompaña husi Xefe Casa Civíl Prezidénsia Repúblika, inaugura Uma Religioza ida husi Filhas Missionária da Divina Misericórdia, iha Metinaro.
Irmã Josefina Bakhita, FMDM nu’udar fundadora ba Misionaria Foun ne’e hato’o agradesimentu ba Prezidente Repúblika J. Ramos-Horta, ne’ebé tulun ona sira hodi harii uma Komunidade Religioza ne’e “Uluk nanain ami agradese ba Na’i Santissima Trindade, no virjen Maria liu husi Prezidente Repúblika J. Ramos-Horta hanesan aman ba nasaun no sai mós em nome inan ba nasaun maibé nia iha fuan aman nian, rona no sente halerik povu ida ne’e, komunidade ka grupu ida ne’e, hanoin atu naha todan ne’ebé nasaun la-lori mesak, kreda la-lori mesak, mai ita hotu hamutuk lori, Tan ne’e na’i Prezidente kolabora ho ami ho taka baluk ida ne’e, ami mós agradese ba entidade hotu-hotu, família, Doadores oin-oin ne’ebé tulun ona konstrusaun ida ne’e” haktuir Irmã Bakhita.
Komunidade “Filhas Missionária da Divina Misericórdia” hahú iha tinan 2013 no agora dadaun nia ezisténsia tama ona ba tinan sanulu resin rua, ho nia membru foin na’in 3 (tolu) no kandidata sira seluk sei iha faze formasaun nia laran. Misaun Própriu husi komunidade ne’e mak, tau matan ba idozu sira, inan ho labarik vítima violénsia sira ne’ebé abadonadu. Prosesu jurídika tuir dalan kreda nian sei iha faze preparasaun nia laran atu hetan rekoñesimentu husi Santa Sé nu’udar kreda Katólika nia ulun.
Jornada pastorál ne’ebé irmã sira ne’e, fofoun hela iha Perumnas Dili, uma aluga ka “Rumah kontrakan-kos” durante tinan 9 (sia) nia laran, ho tulun husi doadór sira, nai-lulik sira, komunidade no xefe pastorál sira ho modu oin-oin. Hafoin sira hetan fatin iha Metinaro-Dili nu’udar rai misaun no pastorál, ne’ebé oferese gratuita husi rai na’in.
Obra konstrusaun ba uma misionária ne’e, hahú iha tinan kotuk 2023 no remata iha fulan-fevereiru 2024, ne’ebé tulun husi Prezidente Repúblika J. Ramos-Horta, liu husi Servisu Sosiedade Sivíl no Asuntu Sosiál hodi realiza konstrusaun ne’e to’o remata ho montante osamentu hamutuk $.32.500,80,- (rihun tolunulu resin-rua – atus lima – Centavos Ualu-nulu).
Komunidade Filhas Missionária da Divina Misericórdia (FMDM) nia ezisténsia foin hahú maibé ho Maromak nia akompaña, sira sei kontinua serbí maluk sira liu husi karisma ne’ebe sira halo.
Média PR/TVE-T
