Tve-t,Dili, 28 Maiu 2024 – Prezidente Repúblika Jose Ramos-Horta simu kredensiál husi Embaixadór foun sira ne’ebé foin nomeadu husi Repúblika Argentina, Repúblika Xile no Repúblika Ghana.
Gustavo Ricardo Coppa aprezenta nia karta kredénsia nu’udar Embaixadór foun Estraordináriu no Plenipotensiáriu Repúblika Argentina ba Repúblika Demokratika Timor-Leste, rezidente iha Jakarta, Indonesia.
Mario Ignacio Artaza Loyola aprezenta nia karta kredénsia nu’udar Embaixadór foun Estraordináriu no Plenipotensiáriu Repúblika Xile ba Repúblika Demokratika Timor-Leste, ne’ebé mós rezidente iha Jakarta.
Florence Buerki Akonor aprezenta nia karta kredénsial nu’udar Embaixadora foun Estraordinária no Plenipotensiáriu Repúblika Ghana nian ba Repúblika Demokratika Timor-Leste, rezidente iha Kuala Lumpur, Malázia.
Xefe estadu Horta simu Embaixadór foun sira no reforsa kompromisu Timor-Leste nian atu hametin relasaun amizade no kooperasaun bilaterál ho Argentina, Xile no Ghana hodi fó benefísiu mútua ba povu tomak.
Horta mos ko’alia liu kona-ba relasaun Timor-Leste nian ne’ebé naruk ho Argentina ne’ebé mai husi estabelesimentu relasaun diplomátika iha 2002. Nia simu kooperasaun ne’ebé kontinua, inklui liu husi akordu kooperasaun téknika 2013 ne’ebé fasilita interkámbiu no projetu konjunta sira.
Ho Xile, Prezidente Repúblika nota relasaun istórika nasaun rua durante luta ba independénsia Timor-Leste nian. Prezidente hato’o nia apresiasaun ba apoiu husi Xile ba kandidatura Timor-Leste nian iha Nasoins Unidas no hein katak relasaun ho Embaixadór foun ne’e sei di’ak liután.
Relativamente ho Ghana, Prezidente Ramos-Horta hatutan fali Timor-Leste nia hakarak atu hametin relasaun amizade ne’ebé hahú iha 2002. Prezidente enkoraja Ghana atu estabelese rezidénsia misaun diplomátika ida iha Dili hodi fasilita kooperasaun ne’ebé besik liu, inklui liu husi forum multilaterál hanesan g7+ no CPLP.
Prezidente Repúblika Horta kongratula Embaixadór foun na’in tolu no hein atu servisu hamutuk ho sira hodi promove ajenda bilaterál sira, reforsa ligasaun amizade nian no esplora parseria ne’ebé benefisia malu iha setór oin-oin iha tinan hirak oin mai.
