Tve-t Dili, Quarta-Feira 26/06/2024 -Estudante Bolsu Integrál Hamutuk 3.030 Ne’ebe mak dadaun ne’e halo Sira nia Estudu iha Universidade Privadu sira La Konkorda no Sei la Asina Kontratu Foun husi Fundu Dezenvolvimentu Capital Humanu FDCH muda fali ba Bolsa Parsiál.
Estudante sira ne’e hato’o sira nia preokupasaun ne’e liu husi Reliza Konfresial Inprensa iha Jardin 5 de maiu Dili Quarta-Feira 26/06/2024.
Iha sira nia karta konfrensia ne’e hateten, Edukasaun nu’udar direitu báziku ba timoroan hotu hodi bele asesu hahú husi pre-primária to’o ensinu superior ne’ebe estipula iha lei inan Konstituisaun RDTL artigu 59. No edukasaun nu’udar setór ida ke mais importante iha ambitu prosesu kontrusaun estadu, Nune’e, estadu kria politika públika oioin hodi tulun ka salva timoroan sira hotu atu asesu ba edukasaun atu sidadaun hotu tenki matenek iha nia rain rasik.
Tanba ne’e, liu husi baze dekretu lei númeru 13/2020, 15 de abril, kon-ba regulamentu FDCH ne Diploma Ministeriál no. 9/2021, 10 de março, VIII governu Konstituisionál oferese bolsa ho tipu integrál ka hakbi’it ba estudante sira ne’ebé kategoria inan-aman la iha kbi’it Objetivu husi bolsa ne’e atu tulun ami kbi’it la’ek nia-oan sira hodi bele asesu ba ensinu superiór iha rai laran.
Tuir dadus ne’ebe Fundu Dezenvolvimentu Kapitál Humanu (FDCH) fó sai iha 30 de abril de 2024 katak, estudante sira ne’ebé asesu ba bolsa hakbi’it, dadaun ne’e eskola iha ensinu superior públiku tantu privadu hamutuk sanulu-resin-neen (16) ho totál estudante 3.030.
“ bolsa integrál ka hakbi’it, tulun tebes ami kbi’it la’ek nia oan sira hodi bele asesu ba ensinu superior. Tanba, hanesan ita hatene, estadu iha kapitál hanesan Dili no munisipiu, la’os deit selu eskola, maibé mós presiza sosa ai-han, selu kós, selu bemo, sosa livru, pulsa intemet, print, fotokópia no nesesidade sira seluk neʼebé bele fasilita estudu estudante kbi’it la’ek nian ho di’ak bazeia ba kontratu ne’ebe mak iha”. Sita iha Karta Konfrensia Imprensa KI.
Maibé, infelizmente ho politika IX governu nian ne’ebé lidera hosi Sua exelénsia Kay Rala Xanana Gusmão ho baze diploma ministeriál no. 11/2024 de 7 de fevereiru, deside muda bolsa hakbi’it ba fali bolsa parsial. Desizaun ida ne’e, tuir ami, injustu teb-tebes no sei la tulun ami kbi’it la’ek nía oan sira atu bele asesu ba ensinu superiór iha Timor Leste.
Tanba ne’e, muda bolsa hakbi’it ba fali bolsa parsial la’os deit difikulta estudante husi ami kbi’it la’ek nia oan sira atu aprende ho di’ak, maibé iha konseküensia seluk mak lori ami kbi’it la’ek nian oan sira hotu tama ba rai-ku’ak.
“nune’e, ami estudante bolsa hakbi’ it iha Timor laran tomak totalmente la konkorda no sei la asina ba karta kontratu foun bolsa hakbi’it muda ba bolsa parsiál ne’ebé FDCH atribui ona ba kada Universidade ho data neʼebé determinadu”.
Tanba ne’e estudante bolsa habi’it iha Timor laran tomak hodi ejize ba IX Governu liu husi Miniseriu Plancamentu Investimentu Estratéjiku ho nia tuteladu FDCH atu.
Kansela imediata ba desizaun politika injustu ne’ebe mula bolsa hakbi’it ba bolsa parsiál ne’ebé bele hamate ami khi’it la’ek nia oan nia futuru no Tenki mantein desizaun ho baze anterior neʼebé fő bolsa integrál ba ami kbi’it la’ek nia oan sira hodi ami bele kontinua ami-nia estudu to’o remata.
Husu mos Estadu liu husi governu labele foti desizaun tuir de’it nia gostu, maibé tenki buka hatene, konsulta no diskuti ho estudante bolsa hakbi’it sira molok toma desizaun ida.
Alende ne’e mos estudante sira rekomenda ba reprezentante povu iha Parlamentu Nasionál liu komisaun G ne’ebé trata asuntu edukasaun atu levanta ami-nia problema ida ne’e iha Parlamentu ho seriedade. Ikus liu, ami estudante bolsa hakbi’it afirma katak karik ejizensia hirak ne’e ladauk responde iha tempu badak, mak ami estudante sira organiza malu hodi halo asaun pasifika kontra ministériu kompetente ho nia tuteladu sira.
