Tve-t, Dili : Kuarta feira (26/06/2024) – Membru hosi Senadu Tailándia no Eis Komandante Supremu Forsa Armada Thilándia, Jenerál Boonsrang Niumpradit ho delegasaun hasoru-malu ho Primeiru-Ministru (PM), Kay Rala Xanana Gusmão iha Palásiu Governu, tersa (25/06/2024).
Jenerál Boonsrang antes ne’e servisu hanesan Komandu bá Forsa Manutensaun Pás nian iha tempu United Nations Transitional Administration in East Timor (UNTAET) iha Timor-Leste durante tinan 2000-2001.
Hafoin enkontru, Jenerál Boonsrang espresa sentimentu kontente tanba bele fila-fali mai iha Timor-Leste hafoin tinan 23.
“Agora tempu di’ak tebes. Timor-Leste moris iha pás no situasaun iha mudansa, iha ona progressu dezenvolvimentu di’ak tebes kompara ho tinan sira antes,” Jenerál Boonsrang hateten.
Tuir nia observasaun, agora situasaun di’ak liu ona, povu moris iha felíz, saudável no iha pontu pozitivu barak.
“Fila-fali mai iha-ne’e sente hakmatek. Ami mós iha espransa katak, presiza halo buat di’ak barak ba rai ida-ne’e liu-liu bá povu nia moris di’ak no moris dignu. Ami fiar Primeiru-Ministru Xanana Gusmão sei halo ida-ne’e,” nia espresa.
Iha oportunidade ne’e, Jenerál Boonsrang aproveita hodi agradese mós bá Primeiru Ministru Xanana Gusmão ne’ebé fó apoiu bá Forsa Manutensaun pás nian iha tinan 2000-2001 bele hetan susesu iha Timor-Leste, liuliu iha promosaun pás nian.
