Tve-t,Dili : kuarta feira (26/06/2024) – Ministru Defeza (MD), Donaciano do Rosário da Costa Gomes “Pedro Klamar Fuik” hakarak dezenvolve Instituisaun FALINTIL Forsa Defeza Timor-Leste (F-FDTL) iha área rua mak hanesan, orienta hodi fó asisténsia umanitária no asisténsia saúde.
Prespetiva dezenvolvimentu iha área rua ne’e, Ministru Defeza aprezenta ona bá Primeiru-Ministru (PM), Kay Rala Xanana Gusmão iha Palásiu Governu, tersa (25/06/2024).
Konseitu atu implementa asisténsia umanitária ne’e tanba atualmente mundu enfrenta hela situasaun ida mudansa kilmátika globál, nune’e bainhira tempu udan halo rai-monu, bee-sa’e, bele iha partipasaun forsas armadas nian hodi bele fó apoiu bá populasaun, hanesan forma ida atu ajuda Estadu konstrui pás ne’ebé mak mundu hakarak.
Konseitu kona-bá dezenvolvimentu forsas armadas iha área asisténsia saúde, tanba haree bá realidade atuál perante mudansa klimátika sempre provoka moras oioin no líder topu instituisaun F-FDTL nian iha ona hanoin atu involve forsas armadas nian hodi bele dezenvolve área espesífiku ida kona-bá asisténsia saúde, atu bele kontribui mós bá sosiedade partikularmente bá iha família militár no populasaun en-jerál.
Tanba ne’e maka bá oin, instituisaun tenke haree oinsá prepara rekursu umanu ne’ebé treinadu no mós iha formasaun adekuadu hodi bele responde no bele ezekuta prespetiva rua ne’e iha futuru.
“Aprezenta tiha prespetiva rua ne’e bá Primeiru Ministru, hanesan orientasaun bá atividade umanitáriu no atividade bá asisténsia saúde, ami tenke haree depois lori ita-nia forsa armada sira atu bele pró-ativu liu bá ita-nia populasaun iha ita-nia rain ho ita-nia rejiaun ne’e,” Pedro Klamar Fuik hateten hafoin hasoru-malu ho Xefe Governu.
Konseitu rua ne’e mós bazeia bá orientasaun pás nian tanba ohin loron funu mosu iha fatin hotu-hotu iha sikun sira mundu nian, no atividade rua ne’e hola parte iha konstrusaun pás iha Timor-Leste no mundu.
