Tve-t,Dili : Kuarta feira (03/07/2024) – Péritu internasionál na’in-sia mai hosi nasaun oioin nomeadu hosi Primeiru-Ministru (PM), Kay Rala Xanana Gusmão nu’udár membru Konsellu Assesoria Internasionál ne’ebé sei fó apoiu gratuita bá Centro Nacional Chega! (CNC) durante tinan tolu.
Membru Konsellu Assesoria Internasionál sira ne’e mak hanesan Ying Hooi hosi Malázia, Gus Miclat hosi Filipina, Nisay Hang hosi Cambodia, Akihisa Matsuno hosi Japaun, Marisa Ramos hosi Portugál, David Webster hosi Cánada ne’ebé oras ne’e iha hela Timor-Leste, no na’in-tolu seluk hanesan Galo hosi Indonézia, Eduardo Gonzales hosi Perú no Reverendo Michele hosi Áfirika Súl mak la mai tanba okupadu ho servisu seluk.
Prezidente Konsellu Admnistrasaun CNC, Pery Mesquita ho diretór ezekutivu CNC, Hugo Maria Fernandes hamutuk ho membru Konsellu Assessoria Internasionál sira ne’e hala’o audénsia ho Primeiru-Ministru (PM), Kay Rala Xanana Gusmão no mós Vise-Ministru Asuntu Parlamentár, Adérito Hugo da Costa iha palásiu Governu, tersa (02/06/2024).
“CNC tutela bá Primeiru-Ministru, Prezidénsia Konsellu Ministru no Vise-Ministru Asuntu Parlamentár. Membru Konsellu Asesoria Internasionál sira ne’e Primeiru-Ministru mak nomeia. Entaun ami mai presta kortezia atu hato’o servisu ne’ebé durante ne’e sei halo no mós atu rona orientasaun bá servisu ne’ebé hamutuk ho Konsellu Administrasaun CNC nian sei halo iha tinan-tolu oin-mai,” Hugo Maria Fernandes hateten hafoin enkontru iha Gabinete Fronteira Terrestre no Marítima.
Knaar hosi Membru Konsellu Assesoria Internasionál sira atu fó assesoria bá Konsellu Administrasaun CNC nian iha área espesifika sira tanba membru sira ne’e maioria professór iha universidade koñsidu sira, balun péritu iha área rekonsiliasaun nian, istoriadór, relasaun internasionál, balun iha esperiénsia barak halo advokasia bá país sira ne’ebé agora iha hela konflitu.
Hugo Maria Fernandes subliña, membru sira ne’e la’ós hela iha Timor mak hala’o servisu, maibé sira nafatin iha sira-nia nasaun mak halo servisu no tinan ida sira mai Timor-Leste dala ida atu bele realiza enkontru jerál no avaliasaun anuál.
“Sira la simu saláriu hosi ita. Katak sira fó servisu gratuita. Bainhira mai Timor mak Governu kobre de’it sira-nia viazen. Sira fó assesoria bá CNC durante tinan-tolu hahú hosi tinan 2024 to’o 2026,” Hugo Fernandes hateten.
Iha fatin hanesan, membru Konsellu Assesoria Internasionál, Akihisa Matsuno sente kontente tebes haree dezenvolvimentu CNC nian, no funsionamentu ne’ebé di’ak tebes.
“CNC servisu iha área barak hanesan apoiu bá eventu sira, halo peskiza kona-bá istória konflitu. Iha seitór edukasaun nian sira prodús livru barak kona-bá istória Timor Leste nian inklui halo kontaktu ho instituisaun internasionál sira. Importante liu maka CNC servisu kona-bá rekonsiliasaun nian tanba ami hatene katak rekonsiliasaun ne’e susar tebetebes,” nia hateten.
Durante hasoru-malu ho Xefe Governu diskute mós asuntu barak tanba Primeiru-Ministru rasik iha esperiénsia barak iha rekonsiliasaun no luta bá independénsia.
Hafoin enkontru, Primeiru-Ministru tara tais no entrega kafé Timor nu’udár sentidu amizade nian.
