Tve-t : Dili (24/07/2024) – Universidade Nasionál Timor Loro-sa’e (UNTL) hala’o lansamentu bá kursu mestradu iha área polítikas polítikas.
Kursu mestradu ne’e, lansa hosi Primeiru-Ministru (PM), Kay Rala Xanana Gusmão akompaña hosi reitór UNTL, João Martins iha salaun UNTL, Caicoli, tersa (23/07/2024).
Primeiru-Ministru konsidera siénsia polítikas públikas importante tebes tanba presiza hamosu diskusaun no analiza krítiku atu forma timoroan ho kualidade iha futuru.
“𝐔𝐍𝐓𝐋 𝐧𝐢𝐚 𝐦𝐢𝐬𝐚𝐮𝐧 𝐦𝐚𝐤𝐚 𝐤𝐫𝐢𝐚 𝐧𝐨 𝐟𝐨𝐫𝐦𝐚 𝐟𝐮𝐭𝐮𝐫𝐮 𝐥𝐢́𝐝𝐞𝐫𝐞𝐬 𝐓𝐢𝐦𝐨𝐫 𝐋𝐞𝐬𝐭𝐞 𝐧𝐢𝐚𝐧. 𝐓𝐚𝐧𝐛𝐚 𝐤𝐮𝐫𝐬𝐮 𝐢𝐝𝐚 𝐧𝐞’𝐞𝐛𝐞́ 𝐢𝐦𝐩𝐨𝐫𝐭𝐚𝐧𝐭𝐞. 𝐇𝐨𝐭𝐮–𝐡𝐨𝐭𝐮 𝐞𝐬𝐟𝐨𝐫𝐬𝐮 𝐚𝐭𝐮 𝐟𝐨𝐫𝐦𝐚 𝐣𝐞𝐫𝐚𝐬𝐚𝐮𝐧 𝐟𝐨𝐮𝐧 𝐭𝐚𝐧𝐛𝐚 𝐢𝐭𝐚–𝐧𝐢𝐚 𝐫𝐚𝐢 𝐩𝐫𝐞𝐬𝐢𝐳𝐚 𝐭𝐞𝐛𝐞𝐬 𝐞𝐦𝐚 𝐧𝐞’𝐞𝐛𝐞́ 𝐦𝐚𝐭𝐞𝐧𝐞𝐤 𝐡𝐨𝐝𝐢 𝐝𝐞𝐳𝐞𝐧𝐯𝐨𝐥𝐯𝐞 𝐧𝐚𝐬𝐚𝐮𝐧, 𝐤𝐚𝐞𝐫 𝐦𝐞𝐭𝐢𝐧 𝐦𝐞𝐡𝐢 𝐞𝐫𝐨́𝐢 𝐬𝐢𝐫𝐚 𝐧𝐢𝐚𝐧,” Xanana Gusmão hateten.
Xefe Governu mós admira no kontente tebes bainhira simu informasaun hosi reitór katak, UNTL prodús ona timoroan 25.000-resin iha área oioin ne’ebé servisu ona iha instituisaun Estadu.
Tanba ne’e, Xanana Gusmão kongratula UNTL ne’ebé loke ona kursu mestradu no promete sei apoia liu-hosi fahe esperiénsia no troka hanoin ho estudante sira hodi motiva sira durante prosesu estudu.
Iha fatin hanesan, reitór UNTL, João Martins informa, tinan barak ona mak UNTL hein hela atu estabelese kursu mestradu ne’ebé importante tebetebes bá Timor-Leste no espera Governu sei tau matan duni bá UNTL liu-liu bá kursu ne’e.
Bazikamente kursu mestradu ne’e atu forma espesialista sira iha área polítikas públikas hodi bele assegura desizaun Governu nian bele bazeia bá evidénsia.
Dosente ne’ebé sei hanorin iha fakuldade siénsia polítikas públikas formadu iha kursu doutoramentu hamutuk na’in-15 no balun mai hosi Universidade Internasionál sira mak hanesan Portugál no Indonézia.
Kursu mestadu, teze hotu-hotu tenke hakerek ho lian Portugés no Inglés tanba ne’e maka molok realizasaun kursu ne’e UNTL realiza uluk ona kursu adisionál lian Portugés durnate fulan-tolu.
Daudaun iha estudante na’in-25, kursu ne’e hahú iha kalan entre tuku 20:00 to’o tuku 21:00, sei selu kada kursu $3.000 ho durasaun tinan-rua.
