Reportajen : Lidia Amaral
TVE-T, Dili – Primeiru-Ministru, Kayrala Xanana Gusmao tuir votasaun Eleisaun Orgaun Suku iha Aldeia Lacoto, Suku Balibar, Postu Administrativu Kristu Rei, Munisipiu Dili (28/10)
Xanana too iha sentru votasaun Eskola TK aldeia iha oras 7:30 dader hamutuk ho populasaun sira kontinua akompaña kedas mini kampaña badak hosi kandidatu xefe aldeia Lacoto no xefe suku sira hodi hato’o sira nia vizaun no misaun ba populasaun antes hala’o votasaun iha oras 09:00 dader
Iha Suku Balibar kandidatu ba xefe suku ema na’in-neen hanesan, Afonso Pereira (Xefe Suku Atuál), Agostinho Saldanha Fernades, Elisa Pereira, Gilyanes da Silva Soares João Gaspar Pinto Fatima, no João Misquita Soares.
Tuir dadus hosi STAE, Suku Balibar ho totál populasaun 786 maka sei ejerse sira nia direitu votus hodi hili kandidatu ne’ebé sei ukun hodi bele hala’o servisu ba suku nian.
Primeiru-Ministru Kayrala Xanana Gusmão husu ba povu Timor-Leste atu partisipa eleisaun komunitariu hodi hili kandidatu xefe suku ne’ebé sira fiar ba ukun tenki hakbesik aan ba povu hodi rezolve povu nia problema no kria paz ba povu hotu husi aldeia no suku hotu- hotu.
“Hau mai nu’udar populasaun aldeia Lakoto hau nia espetativa ita hein xefe aldeia xefe suku no delegadu sira servisu hare ba povu sira nia situasaun liu-liu ba iha seguransa nunee la bele hamosu konfrontu entre artemarsiais sira iha suku laran tanba ne’e iha suku Lakoto sira promete buat hirak nee sei la tama iha suku laran hodi estraga joven sira tanba governu iha programa tinan lima nia laran atu desentraliza mai to’o iha suku no aldeia bele iha ona posibilidade atu hato’o necesidade povu nian iha administrasaun ba povu,”Dehan PM Xanana ba jornalista sira.
Xefe governu dehan, bainhira autoridade sira garante moris hakmatek ba povu maka sei fó rezultadu di’ak atu kontribui ba dezenvolvimentu Timor-Leste. Situasaun eleisaun iha Aldeia Lacoto la’o ho ambiente paz no akompaña direita hosi ekipa STAE no parte seguransa PNTL no F-FDTL hamutuk ho autoridade no juventude sira.
Alende nee Sekretariadu Tekniku Administrasaun Eleitorál (STAE) rasik hala’o ona distribuisaun ba buletin votu ba munisípiu-13 inklui RAEOA ho kuantidade folla no livru ba buletin votu ne’ebé distribui ba suku 442 iha teritóriu hamutuk folla, 942696 no total livru, 18853.92,”nia subliña
Eleisaun Orgaun Suku 2023 ho tema : Atu hametin paz unidade iha ita nia pais mai vota iha eleisaun orgaun suku iha loron 28 fulan outobro tinan 2023 kompete direita hosi kandidatura suku hamutuk ema na’in-2000 resin.
Entertantu Tuir dadus hosi STAE, suku 10 mak la partisipa iha eleisaun tinan ne’e, tanba xefe suku hirak ne’e pertense hosi suku foun sira hanesan, Munisipiu Dili iha suku foun 5, Aileu suku foun-2, Manatutu suku foun- 2, Viqueque- Ossu suku foun.
