PREZIDENTE REPÚBLIKA FÓ POSE BA XEFE ESTADU MAIOR F-FDTL
Palásiu Prezidénsia Nicolau Lobato, Dili, 30 Outubru 2023
Prezidente Repúblika J. Ramos-Horta, fó pose ba Brigadeiru-Jenerál José da Costa Soares ‘’Trix’’ nu’udar Xefe Estadu Maior F-FDTL, iha Palásiu Prezidensiál.
Brigadeiru-Jenerál José da Costa Soares ‘’Trix’’ simu posse hanesan Xefe Estadu Maior das Forsas Armadas hodi troka Xefe Estadu-Maior das Forsas Armadas Sesante, Contra-Almirante Donaciano do Rosário Gomes “Pedro Klamar Fuik”, ne’ebé oras ne’e asumi ona kargu nu’udar Ministru Defeza ba IX Governu Konstitusionál.
Prezidente Repúblika, J. Ramos-Horta iha nia diskursu hateten “ho mudansa lideransa ida ne’e bele dinamiza no adaptável liu tan ba servisu sira iha forsas armadas hodi hasoru dezafiu foun sira iha tempu agora no ba futuru, tuir misaun ne’ebé konstituisaun RDTL atribui, liuliu iha ambiente operasionál ne’ebé depende ba sistema integradu nasionál hodi haforsa kooperasaun ne’ebé amigavel ho nasaun vijiñu no rejionál.”
Xefe Estadu-Maior das Forsas Armadas, Brigadeiru-Jenerál José da Costa Soares ‘’Trix’’ sei fó dedikasaun tomak hodi reforsa Instituisaun F-FDTL. “Ha’u-nia komitmentu mak atu kontribui ba iha reforsa planeamentu jerál no koordenasaun atividades sira ne’ebé tutela ba iha Xefe Estadu Maior das Forsas Armadas, hodi dinamiza liutan servisu operasionál sira”.
TVET & Mídia PR
