DILI, 04 Novembru 2023- Primeiru-Ministru, Kay Rala Xanana Gusmão akompaña hosi Komandante PNTL Munisipiu Bobonaro, Superintendente Xefe, António Maria de Sá no Prezidente Autoridade Bobonaro, Ernesto de Oliveira Barreto
tun direita hala’o dialogu ho povu Suku Lourba, Postu Administrativu Bobonaro, Munisipiu Bobonaro.
Dialogu koninitaria ne’e, Xefe Governu Xanana akompaña hosi Sekretáriu Estadu Protesaun Sivil (SEPS), Koordenador KRAM, Ocatavio da Conceição too iha Suku Lourba simu direita hosi populasaun ho matawen. Maioria vitima afetadu sira kompostu hosi labarik, feto no mate, inklui ferik no katuas sira.
Hafoin kumprimenta vitima afetadu sira, PM Xanana hala’o kedas dialogu komunitaria ho komunidade sira hodi husu informasaun ba Xefe Suku Lourba, Lino da Cruz akompaña hosi Administrador Postu Bobonaro, Juvinal dos Santos no pupulasaun sira hodi kontra kronologia akontesimentu.
Xefe Governu Xanana ho hirus promote ba populasaun sira katak, iha semana ne’e Governu liu hosi Reniaun Konsellu Ministru sei hasai rezolusaun ida hodi taka atividade Arte Marsiál (GAM) Kera Sakti, Korka no Persaudaraan Setia Hati Terate (PSHT) no Grupu Arte Rituál (GAR) “Kolimau 2000”.
“Ha’u dehan katak ba imi, Konsellu Ministru sei deside atu taka kedas atividade Arte Rituál no Arte Rituál, tanba ha’u la permite, se povu ne’e funu no mate iha funu laran, agora ita ukun aan, joven sira mosu mai oho malu bebeik, ida ne’e sei la akontese tan,” dehan PM Xanana durante dialogu.
Xanana deklara, governu sei halo rezolusaun ida ho baze ne’ebé forte atu atividade treinu GAM ho GAR labele kontinua hamosu krime iha fatin publiku.
Iha fatin hanesan, Xefe Suku Lourba, Lino da Cruz agradese ba PM Xanana bele too direita hodi rona informasaun no buka solusaun rezolve problema ho dalan dialogu, inklui lori apoiu umanitaria ba vitima afetadu sira.
Nia regista katak, kazu ne’e akontese kauza hosi juventude sira hosi Suku Carabau, Kota Boot no Tebabui baku uluk vitima ida ho naran Rogerio da Costa. Nune’e ikus mai mosu konflitu fiziku hodi hamosu problema baku rahun no sunu uma komunidade nian.
Autoridade suku ne’e regista akontesimentu ne’e konsege halo pupulasaun lubuk ida halai ba subar iha ailaran no balun ba hela ho familia iha Postu Bobonaro Vila.
“Maoria uma sira ne’ebé ema sunu balun ferik katuas no oan kiak nian,” nia hatete.
Xefe suku ne’e husu ba goveru, atu apoiu nesidade bazika ba vitima sira, no apoia fasilidade hodi hadia hikas komunidade nia uma ne’ebé hetan estragus no husu ba Komandu PNTL no F-FDTL hodi harii postu seguransa hodi asegura seguransa ba povu moris ho hakmatek.
Hafoin hala’o dialogu, PM Xanana fahe kedas apoiu ba vitima sira no husu ba vitima bele hein apoiu ne’ebé governu sei oferese iha tempu besik.
Knfrontu fízika entre grupu juventude sira ne’ebé akontese, sesta (03/11/2023) lokoraik too kalan rezulta ema na’in-hitu (7) kanek no uma ualu (8) sunu, no balun hetan estragu (baku rahun).
Suku Lourba kompostu hosi Aldeia haat, hanesan Sordoli, Lourba Leten, Jobelis no Gumer dadaun ne’e hetan seguransa makas hosi Komandu PNTL no F-FDTL.
Fontes (Midia-GPM)
