Reportajen : Madalena Reis
TVe-t, Díli (04-01-2024) – Presidente República José Ramos Horta ho Primeiro Ministro KayRala Xanana Gusmão, hato’o apresisaun no Kongratula ba PNTL no F-FDTL ne’ebe asegura seguransa, inklui joven sira ne’ebe kontribui ona paz no estabilidade iha âmbito selebrasaun festeza Natal 2023 no tinan Foun 2024, liu husi konferensia imprensa 04/01.
“Ohin enkontru semanal dahuluk Presidente ho Primeiro Ministru 2024 nian, ha’u rásik ho Primeiro Ministro halo apresisaun no avaliasaun Kona ba situasaun seguransa durante periodu Natal 2023 ho tinan foun 2024, ami nia observasaun iha teritoriu nasional no Munisipio, buat hotu la’o di’ak no setor segurança la’o kapas los, komportamento povu nian inklui jovens sira diak tebes. Ne’e duni hato’o parabéns ba joven sira no mos seguransa sira ne’ebe kontribui ba situasaun período Natal no período fim do ano ne’ebe lao di’ak tebes”, Presidente República José Ramos Horta dehan, iha Palasio Presidente Bairo pite, Kinta-feira 04/01.
Alende ne’e Primeiro Ministro KayRala Xanana Gusmão mos apresia ba juramento ne’ebe PNTL no F-FDTL sira halo fo influencia tebes ba jovem sira, no hatudu resultado ne’ebe di’ak iha selebrasaun festeza Natal no Tinan Foun. Nune’e Xefe estado no Xefe Governo husu atu nafatin aplika klima Ida ne’e hodi kontribui paz, domin no dame bele kontinua lao iha iha nasaun Timor-leste.
