Gandhinagar, Índia, 9 Janeiru 2024
Prezidente Repúblika, J. Ramos-Horta, akompaña husi Ministru Negósiu Estranjeiru no Kooperasaun (MNEK), Bendito dos Santos Freitas, partisipa iha serimónia inaugurasaun ba Vibrant Gujarat Global Trade Show 2024, ne’ebé lokaliza iha Gandhinagar-gujarat, Índia.
Vibrant Gujarat Global Trade Show 2024 ne’e inaugura husi Primeiru-Ministru Índia, Narendra Modi, Prezidente Repúblika Timor-Leste, J. Ramos-Horta, Prezidente Repúblika Mozambike, Filipe Jacinto Nyusi no Ministru-Xefe Estadu Gujarat nian.
Hafoin inaugura, Xefe Governu Índia, Narendra Modi, akompañadu husi Xee Estadu Timor-Leste ho Mozambike nian, hala’o vizita ba sentru exibisaun Near Mahatma Mandir Sector 17, iha Gandhinagar-gujarat, Índia.
Entretantu, Prezidente Repúblika, J. Ramos-Horta mós simu konvite husi Xefe Governu Índia, Narendra Modi, hodi partisipa iha Gujarat Global Forum Economic 2024 iha Gujarat Índia.
Simeira vibrante 2024 Gujarat ne’e, sei hahú iha dia 10 Janeiru 2024, iha ne’ebé partisipa husi líder mundiál sira inklui Prezidente Repúblika , J. Ramos-Horta no mós Primeiru-Ministru Repúblika Checo, Peter Fiala.
Eventu ne’e, inisia husi Primeiru-Ministru Índia, Narendra Modi iha tinan 2003. Bainhira Ministru-Xefe Estadu ba Gujarat, nakfilak nu’udar plataforma krusial bá polítiku sira hodi foti desizaun kona-ba investidor sira atu promove kolaborasaun hodi explora oportunidade ba investimentu.
Média PR & TVET
