Reportagem: Madalena Reis
Tve-t, Tersa-feira 16-01-2024 Díli – Relasiona ho informasaun ne’ebe dadaun ne’e espalla iha media sosial kona ba rekezitu rekrutamentu membru foun PNTL tinan 2024 nian hodi halo publiku preokupa, ho nune’e liu husi konferensia imprensa tersa-feira ne’é Porta-voz PNTL Superitidente Polisia Antonio Da Luz informa, husu ba publiku labele konsumu informasaun falsa sira ne’é, tamba husi Komando rasik seidauk hasai rekezitus ne’e, ho nune’e PNTL liu husi Departamentu Investigasaun Kriminal(DIK) hato’o ba publiku katak informasaun ne’e lalos ka falsa.
” PNTL atu fo sai ba publiku, relasiona ho informasaun sira ne’ebe espalla iha Facebook katak PNTL hasai ona kriteria rekrutamentu, liu husi biban Ida né atu fo sai ba publiku katak informasaun ne’e lalos ka Hoax, nune’e husu ba publiku labele konsumu informasaun falsa Sira ne’é tamba husi komadu rasik seidauk hasai rekezitus ida nee”,Dehan Porta-voz PNTL Superitidente Antonio Da Luz iha sala konferensia Komando Jeral Kaikoli, 15/01.
Porta-voz salienta, antes ne’e Ministru Interior Fransisco da costa Guterres fo sai ona kona ba rekrutamentu ba membru foun ne’e los, maibe komisaun husi komando pessoal informasaun rasik seidauk estabelese komisaun ida kona ba kriteria rekrutamentu nian tamba rekezitu sira ne’e sei iha faze preparasaun.
“Kona ba rekrutamentu nian sei iha komisaun rekrutamentu ne’ebe maka sei estabelese no sei fo sai anúncio klaru bainhira komisaun ne’e hetan ona aprovasaun husi Komandante Jeral. Tamba ne’e husu dala Ida tan ba komunidade hotu-hotu atu bele konsidera ida ne’e hodi labele espalla tan informasaun ne’ebe lalos ba publiku”, Nia haklean.
Entertantu liu husi oportunidade ne’e Komando PNTL husu ba jovem sira atu halo preparasaun físico, saúde no labele involve iha hahalok krime sira nune’e bainhira loke rekrutamentu bele iha oportunidade hodi bele kompete.
