Reportajen : Madalena Reis
Tve-t, Tersa-feira 16-01-2024 Dili – Presidente Repúblika hateten, jovem mak hanesan fini no transformador ba Nasaun ho nune’e husu estudante hotu-hotu liuliu estudante finalista sira iha Universidade João Saldanha Hera, atu prepara an hodi estuda maka’as tanba Inan Aman nia sakrifisio mak sai influensia bo’ot ba futuru.
“Ha’u hare Timor oan sira simu graduasaun no Pai Mãe sira orgulho los ne’e hanesan emosional. Portanto Imi tenke estuda, estuda para labele sai fali trai ba sakrifisio ne’ebe Pai Mãe Sira halo, imi tenke orgullu ba Pai Mãe, aldeia suku no servi ba nasaun no sei servi mundu”, Dehan Presidente Repúblika José Ramos Horta liu husi diskursu iha âmbito serimonia graduasaun estudante finalista JSU Hera, Segunda-feira (15/01).
Xefe Estadu mos nafatin dejafia estudante hotu iha Timor-Leste atu nafatin iha vontade hodi aprende klean liu kona ba Ciensia oioin, Tamba Timor-Leste hanesan Nasaun ne’ebe kiik no presija tebes rekursu humanu hodi halo desenvolvimento.
“Ha’u hato’o katak kualidade edukasaun iha Timor-Leste sei kontinua hadi’a iha futuru, hodi haree ezemplu husi nasaun sira seluk liu husi fahe esperénsia ba malu, progresu demokrasia, no dezenvolvimentu ne’ebé Timor-Leste hetan inklui progresu sai membru Organizasaun Mundial Komérsiu(OMK) no ASEAN”, Dehan Horta.
Enkuantu Graduasaun Universidade João Saldanha ba dahuluk ne’e ho total estudante na’in 33, Graduado na’in ne’en husi departamento Ekonomia no Bisnis, alende ne’e estudante na’in 27 mos simu sertifikadu iha kursu matemática,Língua Inglesa no mos estatístika.
