Reportajen:Lidia Amaral
Tve-t, kuarta-feira 17-01-2024 Dili – Bankada opozisaun Kmanek Haburas Unidade Nasional Timor Oan (KHUNTO) preokupa ho problema infraestrutura iha rai laran espesialmente iha Kapital Dili.
Infraestrutura sai preokupasaun ba ema hotu nian, hanesan kondisaun estradas ne’ebe aat, iha parte Munisipio Manufahi-Same, Lospalos, halo ponte kotu espesialmente iha sidade Dili hamosu inundasaun iha fatin lubun, rai rahun aumenta maka’as iha Dili laran hodi fó impaktu ba ema nia saúde.
Nune’e mós mosu degradasaun rai husi foho tun mai kapital Dili ho tahu nurak ne’ebe maka bo’ot, halo valetas no bee dalan hotu nakonu ho lixu no tahu nurak tamba konsiénsia no solidariedade ema ba ema ninian ladun iha. Nune’e mós Governu la iha sistema ne’ebe adekuadu hodi regulariza sistema jestaun ba lixu, kontrolu ba komunidade ne’ebe ke’e rai iha foho lolon hodi halo uma hela fatin no Governo tenke kontrola ba Kompañia ka loja bo’ot hirak ne’ebe halo edifisiu bo’ot barak iha Dili laran.
Buat hirak ne’e hotu ninia rezultadu maka bee dalan no valetas iha bairu-bairu nakonu hó Bee hamosu esgotasaun maka’as, tamba deit lixu no tahu nurak maka nakonu no ikus mai Bee Sa’e halo komunidade balun hetan estragus ba sira nian uma, sasan no viatura iha parte Kaicoli, Bairu Pite, Aimeti Laran no seluk-seluk tan.
Hare ba situasaun hirak ne’e maka Bankada Khunto husu ba Governu kontrola kompañia ka lojas hirak ne’ebe halo edifisiu bo’ot iha Dili no kontrola populasaun ne’ebe kee rai iha foho lolon hodi halo uma, kontrola valetas iha Dili laran tenke rutinitas, hamosu sistema hodi regulariza jestaun lixu, hari uma, sobu meiu ambiente no edifisiu bo’ot iha Dili laran.
