Reportajen : Madalena Reis
Tve-t, Kinta-feira 18-01-2024, Díli – Governu Japaun liu husi Embaixador Japaun mai Timor-Leste Kimura Tetsuya, hato’o agradese ba Estadu Timor-Leste nia apoio Solidariedade ba vítima sira ne’ebe afetadu husi rai nakdoko iha Japaun iha loron 1 Fulan Janeiru tinan ida ne’e.
Embaixador Japaun iha Timor-Leste Kimura Tetsuya hateten, lori Governu Japaun nia naran hakarak hato’o obrigado no agradese ba Prezidente Repúblika, Governu, Parlamentu Nasional no Povu Timor-Leste, kona ba solidariedade no simpatia ne’ebe hatudu husi Estadu Timor-Leste ba vítima sira ne’ebe afetadu husi rai nakdoko iha Japaun ne’ebe ákontese iha inisiu tinan ida ne’e.
“Ohin ha’u mai atualiza ba Prezidente Repúblika kona ba relasaun Bilateral no Kooperasaun entre Timor-Leste ho Japaun, depois ne’e ha’u mos foti oportunidade ida ne’e representa Governu Japaun atu espresa ha’u nia apresisaun sinseriu ba Governo to’o Povu hotu iha Timor-Leste nian kona solidariedade no simpatia ne’ebe hatudu ba vítima sira ne’ebe afetadu husi rai nakdoko iha Japaun”, Dehan Embaixador Japão mai Timor-Leste Kimura Tetsuya hafoin enkontru ho Presidente Repúblika José Ramos Horta iha Palasio Presidensial Bairo Pite, Kinta-feira 18/01.
Enkuantu rai nakdoko ne’ebe akontese ho magnitude 7,6 iha eskala ne’ebe bo’ot to’o iha Península Noto iha Isikawa Japaun ne’e estraga edifisiu no estrada inklui ema hamutuk na’in 84 lakon vida, ema 300 resin mak kanek no ema atus ba atus mak lakon. Entertantu tuir informasaun ne’ebe TVe-t sita husi Média Detik news, dadaun ne’e total ema ne’ebe mate hamutuk nain 126 no ekipa salvasaun Japaun kontinua buka tuir vítima sira ne’ebe to’o agora seidauk hetan.
