Reportajen: Ana Rosaria da Silva
Tve-t, Sesta-Feira 19-01-2024 Dili – Sekretariu Estadu Igualdade Elvina Sousa Carvalho hateten, SEI servisu hamutuk ho parseiru Internasional hanesan United Nation Populasaun Fund (UNFPA) Asosiasaun Portugesa Apoiu Vitima (APAV), hodi responde ba Violensia Bazeia ba Jeneru ne’ebe dala barak liu akontese iha Timor-Leste.
“United Nation Populasaun Fund (UNFPA), hanesan parseiru Internasional hamutuk ho Asosiasaun Portugesa Apoiu Vitima (APAV), servisu hamutuk ho Sekretario Estadu Igualdade (SEI) hodi analiza no hare kona ba Timor-Leste nia sistema referal no hodi resposta ba Vitima sira, tanba APAV nu’udar Organizasaun ida ne’ebe maka iha esperiensia tinan barak hodi hare ba Vitima sira, nomos fo suporta ba Vitima sira wainhira sira hetan Violensia Bazeia ba Jeneru”, dehan Sekretaria Estadu Igualdade Elvina Sousa Carvalho iha Hotel Timor, Sesta-Feira 19-01.
Nia esplika, sira nia prejensa ne’ebe maka dadaun iha Timor-Leste hodi fo apoiu no dezenvolve di’ak liu tan sistema apoiu vitima sira ne’ebe maka iha, nomos bazeia ba nia Planu Asaun Nasional bazeia ba Jeneru nian, hodi fo servisu ou papel importante ba SEI atu bele servisu maka’as iha prevensaun nian.
“Nune’e SEI mai atu hamutuk ho Liñas Ministeriais sira hanesan Ministeriu Solidaridade Sosial, Ministeriu Saude nomos ba Sosiedade Sivil sira ne’ebe maka durante ne’e apoiu Vitima sira no halo parseiru husi UNFPA no APAV sira bele halo dezenvolve diak liu tan hodi bele iha sistema resposta ida ne’ebe maka adekuadu no resposta ida ne’ebe tau Vitima iha sentru atensaun tanba Vitima sira presija tau atensaun, presija resposta ne’ebe maka diak wainhira sira hasoru Violensia Bazeia ba Jeneru”, Tenik nia.
Enkuantu dadaun ne’e prosesu revijaun ba lei Violensia Bazeia ba Jeneru la’o hela ho apoiu husi entidade sira tomak nomos husi Sosiedade Sivil sira nafatin halo komunikasaun ba Parlamentu Nasional nune’e bele avansa ho revizaun Lei refere, no iha fulan ne’en ba kotuk prosesu la’o hela no parte husi Sekretariu Estadu Igualdade tenki halo komunikasaun atu nune’e bele avansa ba oin no lei kontra Violensia Bazeia ba Jeneru sei halo iha tempu badak.
