Franca , 24 Janeiru 2024 Fransa – Prezidente Repúblika José Ramos Horta hala’o enkontru ho nia Homólogu Xefe Estadu Fransa, Emmanuel Macron, iha Palásiu Élysée, sidade Paris, Quarta 24/01.
Durante enkontru Xefe Estadu rai-rua ne’e diskuti kona ba komprometidu atu kontinua servisu hamutuk iha inisiativa ruma nível internasionál liu-liu liga ho preokupasaun Prezidente Horta nian kona-bá luta kontra extrema pobreza iha mundu liu-liu ba labarik no inan-feton sira.
Horta mos kontinua husu ba Prezidente Marcon atu mobiliza investedor ba Timor-Leste liu-liu iha area hotelaria ho nível fitun V nune’e, Macron responde kedas katak sei koalia ho empreza hotelaria sira iha tempu badak ne’e.
‘’Atu remata, ha’u husu atu loke embaixada ida iha Timor-Leste. Macron simu no tempu badak sei organiza ho Ministériu Negósiu Estranzeiru atu hare assuntu ne’e. Tamba ita, importante mak rai-bo’ot sira loke sira nia embaixada,’’ Horta esplika.
Horta Subliña, vizita Fransa la’ós konvite hosi Estadu Fransa, nune’e enkontru ho nia homógu Prezidente Fransa Emmanuel Macron, hanoin atu halo de’it enkontru informál, maibé to’o iha Palásiu Prezidensiál Fransa, simu ho parada militár (guarda de Honra), tamba ne’e Xefe Estadu Horta apresia tebes.
Enkuantu iha Sorumutuk ne’e, nu’udár sorumutuk dahuluk nível Xefe Estadu Timor ne’ebé foin akontese iha istória entre rai-rua ne’e.
‘’Koalia kona-bá projetu tasi-mane no kona-bá portu foun iha Tibar ne’ebé halo hosi kompañia Franses (Boloré), no nia (Macron) kontente ho informasaun sira ne’e. Ami koalia mos kona-bá Timor atu tama ASEAN inklui kona-bá Xina no diskute mos kona-bá problema Myanmar,’’ Horta esplika hafoin enkontru ho Prezidente Macron.
Enkuantu Durante enkontru, Prezidente Fransa mos admira ho pozisaun Horta nian liga ho assuntu Myanmar ne’ebé oras ne’e hahu iha ona mudansa tambá líder sira iha Myanmar (pro-Demokrasia) husu Prezidente Horta bainhira ba Fransa atu koalia mos kona-bá Myanmar liu-liu husu apoiu ba Fransa atu tulun sira (Myanmar) iha rekursu humanu bainhira problema junta militár remata.
