Reportagem : Madalena Reis
Tve-t, Segunda-feira 12-02-2024 Díli – Representante Santasé iha Timor-Leste Mgr. Marco Sprizzi hato’o apresiasaun ba Governu no mos povu Timor-Leste kona ba preparasaun hodi simu Papa Francisco mai Timor-Leste iha tinan ne’e
Marco Sprizzi informa, Governu Timor-Leste halo hela preparasaun exelente no simu delegasaun husi Vatikanu iha loron hirak liu ba ne’ebé hela iha Timor loron tolu nia laran hodi halo survei ba fatin hotu-hotu ne’ebé durante vizita Papa Francisco nian sei ba
“Ida ne’e hanesan enkontru ofisial ida ho Prezidente Repúblika hafoin Xefe Estadu halo nia vizita ofisiál no vizita estadu ba Vatikanu hodi hasoru Papa Francisco no iha enkontru ne’e Xefe Estadu atualiza mós ba ha’u kona-ba importánsia husi vizita ne’ebé halo ho Papa Francisco.Hanesan ita bo’ot sira hatene no mundu tomak ko’alia kona-ba preparasaun vizita Papa Francisco mai Timor Leste, entaun ita seidauk bele konfirma data loloos tanba ida ne’e sei anunsia husi Santa-Sé hamutuk ho governu Timor Leste, mais la’ós ona segredu tamba iha ona preparasaun ba possivel Papa Francisco nian ne’ebé Timoroan hotu-hotu hein no presiza servisu maka’as. Ha’u hakarak hatete governu Timorenese halo hela preparasaun exelente no ita simu delegasaun husi Vatikanu iha loron hirak liu ba ne’ebé hela iha Timor loron tolu nia laran hodi halo survey ba fatin hotu-hotu ne’ebé durante vizita Papa Francisco nian sei ba”, Dehan Representante Santasé iha Timor-Leste Marco Sprizzi, hafoin enkontru ho Presidente Repúblika José Ramos Horta iha Palasio Presidensial Bairo Pite Díli Segunda-feira (12/02).
Entertantu iha eventu lubuk ne’ebé sei akontese iha vizita Papa Fransisco nian no Santase halo ona reuniaun barak ho ekipa Governu nian, ho Ministériu oin-oin ne’ebé lideradu husi Primeiru Ministru no delegasaun husi Vatikanu presionadu ka orgullu ho servisu ne’ebé Governu Timor-Leste halo kona-ba preparasaun atu simu Papa Francisco nia vizita nian.
“Ha’u hakarak agradese hodi Santa-Sé nia naran ba Estadu Timor Leste, Prezidente Repúblika, Primeiru Ministru, no ministériu hotu-hotu ba servisu sira kompetente, exelente no efisiente ne’ebé feitu nu’udar preparasaun ba eventu vizita Papa Francisco.Vizita Santu padre Papa Francisco nian nu’udar vizitante estadu mas prinsipalmente ne’e nu’udar vizita pastorál, hanesan pastor ne’ebé mai vizita nia povu”, Nia dehan.
Marco afrima, primeira preokupasaun ne’ebé Santu padre Papa Francisco iha mak oinsá povu bele hasoru nia no nia bele hasoru povu. Iha país hanesan Timor Leste iha ne’ebé mundu tomak hakarak hasoru Papa Francisco to’o sira husi relijiaun seluk ne’ebé hakarak partisipa iha festa povu nian tamba ne’e mak tenke garante seguransa, saúde, transporte no fatin ne’ebé dignu ho kondisaun dignu mós atu ema hotu bele partisipa ho di’ak iha eventu sira no missa ne’ebé Santu Padre mak sei prezide.
“Preokupasaun seluk mak liga ho konsikuensia sira tanba ne’e presiza organiza ho di’ak no efesiente para Papa Francisco bele iha espasu livre ba deskansa hodi rekupera enérjia atu bele iha sorumutu sira ho forsa fízika, intelektual, nune’e bele fó ho másimu ba povu”,Nia esplika.
Nia haklean, Santu Padre Papa Francisco hakarak koñese besik liu povu Timor no iha domin boot bá Timoroan sira no bá nasaun ida-ne’e. Ho nune’e Papa Francisco iha espetativa no ho ksolok prepara nia vizita mai Timor-Leste.
