Tve-t, Kuarta- feira 14-02-2024 Dili – Bankada FRETILIN iha Parlamentu Nasionál solidariza no husu liberta emediatamente profesores kontratadu na’un 10 ho ativista hamutuk nain 4 ne’ebé detein iha sela Polisia Nasionál Timor-Leste (PNTL) iha loron 12 Fevereiru 2024.
Bankada FRETILIN konsidera detensaun ne’ebé PNTL halo iha loron 12 Fevereiru 2024 ne’e laiha fundamentu tanba profesores kontratatu ejizé sira nia direitu tuir Konstituisaun RDTL artigu 50, Direitu ba Servisu “Sidadaun hotu-hotu feto ka mane, iha direitu no devér atu halo servisu no livre atu hili nia profisaun,” .
Artigu 42 Konstituisaun RDTL garante liberdade reuniaun no manifestasaun nian, iha aliña primeiru “Iha garantia Liberdade ba ema hot-hotu ne’ebé hakarak halo reuniaun iha pàs no la kaer kroat, no sira lalika husu uluk autorizasaun.
Maibé Ministra Edukasaun taka portaun ba profesores kontratadu sira ne’ebé hakarak koalia ho Ministra Edukasaun kona-ba sira nia problema, Ministra Edukasaun hatudu deit nia inkapsidade no laiha vontade diak atu rezolve problema ne’ebé mak profesores kontratadu sira infrenta.
Desizaun Ministeriu Edukasaun ne’ebé la prudente no kuidadu afeta maká’as ba funsionamentu iha prosesu aprendizagen iha eskola hotu, no viola direitu estudante barak ne’ebé konsagra iha Konstitusaun RDTL artigu 59 koalia kona-ba edukasaun no kultura “Estadu rekoñese no garante sidadaun hotu-hotu nia direitu ba edukasaun no kultura, nune’e mós harii sistema ensinu báziku universal obrigatóriu no wainhira bele, saugate, tuir lei haruka,”
Tanba ne’e dala ida tan, Bankada FRETILIN ejizé Ministériu Edukasaun rejolve problema profesores kontratadu sira, no liberta emeditamente profesores nain 10 inklui ativista nain ha’at (4) ne’ebé detein iha sela PNTL Munisípiu Dili.
