Reportagem: Sidonio Caet
Tve-t, Dili (Kuarta-Feira 21-02-2024) – Primeiru-Ministru (PM), Kay Rala Xanana Gusmão, hala’o enkontru Kortejia ho Jornalista Senior Italiano, Emanuele Giordano, ne’ebé hala’o vizita mai Timor-Leste atu haree besik liután demokrasia no liberdade imprensa iha Timor-Leste nian.
Iha Vizita Jornalista Senior ne’e, nu’udar parte ida atu hala’o mós entrevista ho Xefe Governu Xanana, kona-ba programa IX Governu Konstitusionál iha área oin-oin.
“Ida ne’e nu’udar primeiru vizita mai Timor-Leste hodi hasoru mós ho Primeiru-Ministru Xanana ne’ebé ko’alia mós kona-ba knaar média Timor-Leste fantastiku tebes, tanba sei entrevista primeiru-ministru kona-ba rai Timor-Leste,” sailenta Jornalista Senior Emanuel Giordano, hafoin enkontru ho PM Xanana iha Palasiu Governu, Dili.
Enkuantu iha enkontru ne’e, Xefe Governu Xanana introdus kona-ba papél média imprime no eletronika Timor-Leste uza sira nia demokrasia sai kontrolu sosiál ba atividade hotu- hotu ne’ebé entidade estadu no públiku hala’o iha Timor-Leste.
Governante ne’e rasik define iha ninia planu no programa sei kontinua hametin liberdade imprensa hodi garante sidadaun sira asesu ba informasaun ho loos no kredivel.
Entertantu Tuir notisia internasionál nia fó sai kona-ba Liberdade Imprensa mundiál tinan 2023 versaun Reportagen sem Fronteira ka Reporters Without Borders (RSF), Timor-Leste (TL) tama iha kategoria Liberdade imprensa di’ak, ne’ebé okupa númeru 10 hosi nasaun 180 iha mundu tomak.
