Reportajen : Lidia Amaral
Tve-t, Dili Quinta–Feira (22/02/2024) – Konsellu Ministru aprova projetu Proposta Lei, ne’ebé aprezenta husi Ministru Obras Públikas, Samuel Marçal, kona-ba Medida sira atu Proteje Legalidade Urbanístika.
Ho vigora rejime jurídiku ba edifikasaun no urbanizasaun, ne’ebé regula lisensiamentu ba konstrusaun no utilizasaun ba edifísiu sira, nune’e Governu presiza atu fó ferramenta legál ho lolos hodi bele garante aplikasaun ba rejime ida ne’e.
Tanba ne’e, projetu Proposta Lei ne’e iha objetivu atu estabelese medidas atu proteje legalidade urbanístika, regula aktu administrativu nesesáriu ne’ebé garante hodi kumpre lejizlasaun kona-ba lisensiamentu operasaun urbanístika, edifikasaun, nune’e mós hodi kumpre ba instrumentu jestaun territoriál nian.
Ekuantu liu husi proposta lei ida ne’e sei aplika medida lima atu proteje legalidade urbanístika – embargu, demolisaun (sobu) obra, despeju administrativu, sesaun ba uzu no prosedimentu legalizasaun ne’ebé sei permite Governu atu atua no hadi’a legalidade urbanístika, no konsidera grau gravidade ilísitu urbanístiku no obra ne’e bele legaliza ka labele.
