Reportajen : Madalena Reis
Tve-t, Dili Kinta – Feira (22 fevereiru 2024) – Primeiru Ministru (PM) Kay Rala Xanana informa embaixadór naun-rezidente sira husi nasaun sanulu-resin-ida aprezenta sira-nia karta kredensiál ba Prezidente Repúblika hodi tau konfiansa ba governu hodi hametin sira nia kooperasaun bilaterál hodi apoia servisu iha área importante sira Timor-Leste.
Xefe Governu Xanana informa asuntu ne’e, hafoin hala’o enkontru semanál ho Prezidente Repúblika, Jose Ramos Horta hodi deskute knaar servisu embaixadór nasaun 11 kompostu hosi Repúblika Arab Ejitu, Canada, Dinamarka, Repúblika Helenika (Grece), Repúblika Islamista Iran, Repúblika Islamika Pakistaun, Reinu Kamboja, Repúblika Demokratika Povu Laos, Repúblika Demokratika Povu Algeria, Repúblika Afrika Sul no Suesia ne’ebé hametin sira nia relasaun diplomátika ho Timor-Leste.
Área prioridade sira ne’ebé Xefe Governu no Embaixadór sira aseita atu koopera servisu, sei aprezenta ba ministéria hotu- hotu atu halo preparasaun hodi too tempu asina akordu formal bele apar ho programa governu no doadres sira nian apoia.
“Foin lalais Prezidente Repúblika simu embaixadór barak teb-tebes mai hosi rai ne’ebé foin maka haruka embaixadór mai iha ne’e (Timor-Leste). Embaixadór balun mós primeira-vez mak mai Timór. Ne’ebé ha’u informa ba Prezidente enkontru sira ne’ebé ha’u halo ho embaixadór sira ne’e, to’o de’it horseik. Ha’u bele dehan katak embaixadór hotu-hotu sira iha konfiansa ba atuál situasaun Timór nian nomos oferese iha área ne’ebé de’it mak iha ita hodi sira bele kontribui. Ha’u sei haruka ba ministériu hotu-hotu iha área ne’ebé sira oferese bele kontribui ba dezenvolvimentu,” informa PM Xanana ba jornalista iha Palasiu Prezidensiál, Dili.
Xanana informa, área lubuk ida maka embaixadór sira ne’e aprezenta hanesan setór agrikultura, edukasaun, saúde no balun iha indústria, formasaun rekursu umanu. Ne’ebé sira haree tiha Timór balun hakarak la’o haleu uitoan, sira senti katak kona-ba demokrasia, rekonsiliasaun no pás, sira konsidera Timor-Leste nu’udar nasaun ida ne’ebé fó ezemplu di’ak.
Xefe Governu Xanana ho Xefe Estadu J.Ramos-Horta deskute mós asuntu ASEAN no adezasaun TL sai membru Organizasaun Mundiál Komérsiu (OMK).
“Ami mós ko’alia kona-ba situasaun iha mundu, situasaun iha rejiaun, ko’alia kona-ba Timor-Leste atu tama ba Asosiasaun Nasaun Sudeste Aziátiku (ASEAN, sigla ingles) no Organizasaun Mundiál Komérsiu (OMK),” dehan PM.
Nu’udar nasaun foun Timor-Leste tenke prepara-aan ba iha dezafiu boboot sira ne’ebé mosu dadauk, dezafiu boot liu maka atu haree ba dezenvolvimentu nasaun nian, dezafiu boot seluk maka oin nusa mak Timor-Leste bele fó konfiansa iha ASEAN tomak hodi simu TL sai membru no dezafiu ida seluk mós ho OMK ne’ebé dala ruma ema hotu preokupa más atu loke dalan haree oin nusa maka ikus mai bele favorese ba benefisiu nasaun no povu Timor-Leste
Prezidente foin dadauk bolu Embaixadór sira ne’e mai ho forma ida hatudu ba sira hahán ne’ebé prepara, ida-ne’e hatudu katak Timór mós iha kbiit promove aihan lokál atu promove ba turista sira.
“Ita tenke kontinua nafatin hodi turista sira mai la’ós han supermie. Ne’ebé kuandu ita dezenvolve ita-nia produtu sira ne’e hotu ho di’ak ita bele, no buat ne’ebé ita prodús hodi dudu setór privadu (pequena, media indústria) prodús aifuan sira sai bebida. Ne’e maka molok atu dezenvolve di’ak liután turizmu iha ita-rain, Governu sei buka atu tau atensaun ba produtu lokál sira hodi ita bele transforma produtu sira ne’ebé povu agrikultór kuda sai aihan no bebida,” haktuir Gusmão.
Ekuantu Prezidente Repúblika mos informa katak sesta-feira (23/02) sei viazen servisu ba Abudhabi, hosi Governu mós sei ba hodi asina akordu OMK, no membru Governu balun mós ba tanba iha enkontru ligadu ho setór importante balun.
