Reportajen : Lidia Amaral
Tve-t, Dili Sexta Feira (23/02/2024) – Primeiru-Ministru (PM) Kay Rala Xanana Gusmão hala’o enkontru ho Prezidente Administrasaun Consellu Combatentes Libertasaun Nasionál (CCLN), Vidal de Jesus “Riak Leman” Vice Preziente CCLN, Marito Reis no Vice Prezidente Brigadeiru Jenerál, João Miranda “Aluk Descartes” ho ekipa hodi atualiza preparsaun selebra loron Nasionál Veteranus iha 03 Marsu 2024 no asuntu kriasaun fundu no harii banku veteranus nian.
Prezidente CCLN Vidal de Jesus “Riak Leman” hateten, enkontru ho Primeiru Ministru hodi relata tema ne’ebe mak hili selebrasaun loron veteranu nian ba tinan ne’e maka “Hamutuk La’o Ba Oin” ho sentidu atu bolu entidade hotu- hotu liu-liu veteranus nu’udar rin estadu nian atu kontribui no partisipa nafatin iha prosesu harii dame no harii estadu.
“Ami mai hasoru Primeiru-Minitru, ami ko’alia asuntu rua, asuntu ida maka preparasaun loron 03 de Marsu nian, ami husu atu Maun Boot atu ba loke hela ami nia loron nasionál veteranu nian hodi hato’o mensajen gravasaun ba veteranus munisipiu 13 ne’e hotu inklui RAEOA no asuntu seluk mak kona-ba kriasaun fundu ba veteranus sira nian,” informa Prezidente CCLN, Riak Leman ba jornalista, hafoin enkontru ho PM Xanana iha Palasiu Governu, Dili.
Riak Leman dehan, aprezentasaun ne’e hetan apresiasaun hosi Komandante Xefe das FALINTIL, Kay Rala Xanana Gusmão hodi agradese no apoia nafatin servisu hotu ne’ebé ekipa hala’o.
Kona ba kriasaun fundu ba veteranus sira nian, CCLN fó fiar ba Xefe Governu Xanana iha 2024 nia laran bele fó ona solusaun di’ak.
“Ami espera iha 2024 nia laran, hakarak ka lakohi banku ne’e atu harii. Fundu veteranus nin too ohin loron hamutuk $41 milloes,” nia hateten.
CCLN rasik koordena no hasoru malu ona ho Governador Banko Central, Helder Lopes hodi ko’alia kona-ba preparasaun rekursu umanu harii banku no kriteria legál sira atu harii Banku Veteranus kompleita ho estatutu no mata dalan ba lei sira hotu inklui harii ba harii banku iha eis edifisiu Arte Moris Komoro, Dili.
Enkuantu Ajenda preprasaun selebrasaun loron Nasionál Veteranus hahú iha loron 01 marsu sei selebra misa nasionál ba eroi sira hotu depois lori aifunan no lilin ba presta omenajen iha Simintériu Jardin Eroi Nasionál Metinaro inklui mós munisipiu hotu.
CCLN konvida mós bainaka veteranus hosi nasaun viziñu Austrália no rai seluk hodi vizita muzeu rezisetensia ne’ebé prezerva dokumentu no materiál funu nian inklui istória luta Timor-Leste nian.
Iha loron 02 Marsu sei selebra semináriu nasionál ne’ebé sei halibur orador importante sira hodi ko’alia kona-ba istória luta FALINTIL ho povu no loron 03 Marsu maka foin selebra serimónia nasionál ijar baindeira nasionál hamutuk ho Komandu FALINTIL-Forsa Defeza Timor-Leste no realiza marsa ba dame hosi Palasiu Governu ba salaun Centru Convensaun Dili (CCD).
