Reportagem: Sidonio Caet
Tve-t Dili Sexta-Feira (23/02/2024) –Institutu Dom Boaventura de Timor-Leste (IBTL) ne’ebe harii husi Fundasaun LELAMAR (Fundasaun Leo Laku Manufahi Riak) hetan ona Akreditasaun husi Agência Nasional para a Avaliação e Acreditação Académica (ANAAA -sigla lian Portugues ) atu prepara Timor oan ho kualidade hodi dezenvolve siénsia, teknolojia, arte no kultura
Institutu Akademika IBTL harik ho nia vizaun atu Forma ema ho koñesimentu no kapasidade atu dezenvolve siénsia, teknoljia, arte no kultura hodi fó progresu ba Nasaun Timor-Leste.
“Loron ida ohin, ami estrutura sivitas akadémiku tomak hamutuk ho estrutura Fundasaun LELAMAR. hakarak hato’o ba públiku tomak katak iha Rai Manufahi, hamriik tia ona Institutu Privadu ida ho naran Institutu Dom Boaventura de Timor-Leste iha Loron 11 Dezembru 2016”. Sita iha Komunikadu impresa.
Aleinde vizaun ne’e mos IBTL iha Misaun bo’ot mak hanesan ;
- Prepara rekursus umanus Timor-Leste, ho koñesementu no kualidade tuir nesesidade progresu nasaun nian.
- Prepara Timor oan ho kualidade hodi dezenvolve siénsia, teknolojia, arte no kultura.
- Forma karakter Timór-oan ho konsiénsia moral ba siénsia no teknolojia, hodi hetan prosperidade sosiál no ekonómiku husi Povu no Nasaun Timor-Leste.
Institutu Akademiku IBTL ne’e mós eziste ho objetivu rua neʼebé mak bele kaer hodi motiva liu tan Estudante sira nia esforsu sira mak hanesan tuir mai:
- Dezenvolve rekursus umanus ho kualidade tuir nesesidade Nasaun no evolusaun siénsia no teknolojia nian hodi hatán ba nesesidade nasaun no estadu Timor-Leste nian.
- Prepara rekursus umanus Timór-oan ho hanoin patriotizmu no nasionalizmu. Hanoin deit ba nia rain hodi tinu no bali matenek sira ne’ebé sira hetan ona durante estudu iha institutu.
Instituisaun refere eziste ona durante tinan walu (8) ho kbiit ne’ebé natoon husi Fundasaun LELAMAR, iha dedikasaun, kometimentu no sakrifisiu neʼebé fundasaun no sivitas akadémiku tomak prepara hodi simu avaliasaun akadémiku neʼebé mai husi Agência Nasional para a Avaliação e Acreditação Académica (ANAAA). Durante tinan barak nia laran, ami titu no hein, maibė susar atu hetan akreditasaun iha tinan lubuk nia laran liu ba.
“Ohin, ami mai iha ita boot sira nia oin, hamutuk ho Fundasaun LELAMAR (Fundasaun Leo Laku Manufahi Riak) ho fuan no laran tomak, hakarak hato’o ami nia agradesimentu boot tebe-tebes ba parte hotu ne’ebé halo serbisu maka’as hodi ohin loron, IBTL ninia estatutu, hanesan mós ha Institutu privadu sira seluk iha Timor-Leste”
Iha biban ida ne’e, deklara ba públiku tomak katak, Sivitas Akadémiku tomak no FULELAMAR, ho fuan no laran tomak dala ida tan hakarak hato’o ami nia agradesimentu espesiál ba Ministériu Ensinu Superiór no ANAAA, ne’ebé nafatin konsidera IBTL hodi kontinua halo avaliasaun Institusional no programa akadémiku holu IBTL nian ne’ebé fó sai ona nia rezultadu iha loron 9 Februaria tinan 2024 ho valor C.
Tanba ne’e IBTL hahu loke ona Inskrisaun foun ba Estudante finalista tinan akademiniku 2024 no inskrisaun refere hahu iha loron 26 fulan Februaru to’o loron 4 fulan Marsu tinan ne’e.
Institutu Akademika IBTL, oras ne’e dau-dauk iha fakuldade 4 mak hanesan Fakuldade Engeneria ho nia Departmentu rua mak hanesan Departementu Teknik Sivil, Departementu Informatika, Fakuldade Ekonomia ho nia Departmentu Jestaun, Fakuldade Saude, Departmentu Enfermajen, Departmentu Saude Publiku, Fakuldade Agrikultura Departmentu Agronomia.
IBTL mos iha Rekursu sira Atu halo funsionamentu IBTL nian, la’o ho di’ak tuir espektasaun povu Timor-Leste nian ne’ebe dau-daun ne’e iha Dosente Permanente iha ema na’ïn 56, ne’ebé ho grau akadémiku Strata 1, iha ema na’in 38, Mestradu iha ema na’in 14 no Dotoramentu iha ema na’in 12 no Sala aprendizajen hamutuk 153, Laboratóriu iha Sala hamutuk 24, Sala biblioteka 1.
Tanba ne’e atu mellora di’ak liu tan kualidade aprendizajen nianSei realiza atividade semináriu akadémiku ho tópiku oi-oin ne’ebé IBTL koopera ho Instituisaun oi-oin iha nivel Munisipiu Nasional, Rejional no Internasionál hodi mai fahe sira nia matenek sobre siensia no teknolojia ne’ebe mak sira iha ho estudante no dosentes sira IBTL nian.
