Reportajen : Madalena Reis
Tve-t Díli, Kuarta-feira (06-03-2024) – Prezidente Repúblika (PR) José Ramos Horta, Kuarta-feira ne’e simu tan Karta Kredensial diplomátika husi Embaixador Atipat Rojanapaibulya, nu’udar Embaixadór foun Extraordináriu no Plenipotensiáriu Reinu Tailándia nian ba Repúblika Demokrátika Timor-Leste.
Embaixadór Atipat Rojanapaibulya hahú nia kareira diplomata iha Ministériu Negósiu Estranjeiru Tailándia iha 1990. Antes ne’e, nia serbí iha Embaixada Royal Thailand iha Seul, Nova Iorke, Jakarta, no Tel Aviv, no mós kaer pozisaun iha sede Ministériu nian iha Bangkok.
Iha entrevista Ministru Negosio Estrangeiru no Kooperasaun interinu No Atual Ministru Presidencia Konsellu Ministru Hermegildo Antonio Cabral Pereira Esplika, Embaixador foun ne’ebe entrega ona Karta Kredensial sei kumpri nia mandatu no iha ona planu kona ba oinsa suporta dezenvolvementu Timor-Leste nian iha Área oioin.
” Ohin Embaixador entrega Karta Kredensial ba Prezidente Repúblika, hanesan babain embaixador foun Sira kuandu simu Sira Nia mandatu hahu ona ohin entrega ona, nune’e Embaixadór mos iha ona ideias no planu Kona ba oinsa maka atu kumpri nia mandatu hodi suporta dezenvolvementu Timor-Leste nian no hametin liu tan Tailândia Nia kooperasaun ho Timor-Leste, hanesan Edukasaun, Agrikultura no meiu ambiente ne’ebe maka agora modernu”, Agio Perreira Informa iha Palasio Presidensial Bairo Pite Díli, (05/03).
Agio salienta, embaixador foun ne’e durante nia mandatu sei koopera mos ho Governu nune’e bele haforsa relasaun bilateral entre estado rua ne’e.
Timor-Leste no Tailándia iha relasaun ne’ebé besik no la’o ho di’ak dezde Timor-Leste nia independénsia, ne’ebé hamosuliu husi diplomasia dezenvolvimentu Tailándia nian husi kooperasaun téknika liu husi Ajénsia Kooperasaun Internasionál Tailándia nian (TICA). Governu Royal Tailándia ajuda ona dezenvolvimentu Timor-Leste nian iha área sira hanesan agrikultura, saúde publika, dezenvolvimentu rurál, turizmu, edukasaun no kapasitasaun ba funsionáriu públiku sira. Tailándia mós oferese bolsa estudu asisténsia dezenvolvimentu, implementa Liurai nia projetu iha Timor-Leste, no apoiu prosesu preparatóriu nasaun nian hodi tama ba ASEAN nu’udar estadu membru.
Relasaun diplomátika entre nasaun rua ne’e estabelese iha fulan-outubru 2002, hafoin Timor-Leste restaura fali ninia independénsia, no hametin liután partisipasaun Tailándia nian iha forsa manutensaun pás Nasoins Unidas nian iha Timor-Leste durante administrasaun tranzitóriu ONU nian.
Prezidente Ramos-Horta hato’o nia konfiansa katak Embaixadór Atipat Rojanapaibulya nia nomeasaun sei hasa’e no hametin ligasaun amizade no kooperasaun entre Timor-Leste no Tailándia.
